Read Библија, Константинов Псалми 109 Bible Online

Псалми 109 - Библија, Константинов bible

Псалми 109

¹За началник на пејачи. Давидов псалм. Боже, моја славо, не молчи!

²Безбожничка и измамлива уста се отвори против мене, зборува со лажлив јазик,

³ме опкружува со зборови на омраза, ме напаѓа без причини.

⁴Тие ме оптужуваат за мојата љубов, а јас само се молам.

⁵Ми враќаат зло за добро, омраза за мојата љубов.

⁶Крени го безбожникот против него и тужителот нека му застане оддесно!

⁷Кога ќе му се суди, нека биде осуден, и молитвата да му се земе за грев!

⁸Неговите денови нека бидат малубројни, неговата служба нека ја добие друг!

⁹Неговите деца нека останат сираци, а неговата жена вдовица!

¹⁰Неговите деца нека бидат скитници, просјаци, нека бидат исфрлени од опустени домови!

¹¹Заемодавачот нека му го присвои сиот имот, туѓинците нека го разграбаат плодот на неговата мака!

¹²Никој нека нема сомилост кон него, никој да не им се смилува на неговите сираци!

¹³Нека му се затре потомството, во второ колено нека згасне неговото име!

¹⁴Да си спомнува Господ за неговите гревови, и гревот на мајка му нека не биде избришан:

¹⁵нека бидат секогаш пред очите на Господа! Нека се избрише нивниот спомен од земјата;

¹⁶зашто не се сети да прави милостина, туку ги гонеше бедните и немоќните и го тераше во смрт човекот со разбиено срце.

¹⁷Го сакаше проклетството, па нека го стигне, не сакаше благослов, нека е далеку од него!

¹⁸Нека се облече со проклетство како со облека, нека влезе во него како вода, и како масло во неговите коски.

¹⁹Да му биде облека со која се покрива, појас со кој се препашува секогаш!

²⁰Така нека им плати Господ на моите тужители, што зборуваат зло против мојата душа!

²¹А Ти, Боже Господи, заземи се за мене, заради Своето Име, спаси ме, зашто е милостива Твојата љубов!

²²Зашто сум беден и сиромашен, и моето срце е рането во мене.

²³Јас исчезнувам како сенката што превалува, ме гонат како скакулец.

²⁴Колената ми се изнемоштени од пост и моето тело ослабе, без масло.

²⁵Им станав ним за укор, мрдаат со главата кога ќе ме видат.

²⁶Помогни ми, Господи, Боже мој, спаси ме според Твојата добрина!

²⁷Нека знаат дека ова е Твојата рака и дека Ти, Господи, го направи тоа.

²⁸Тие нека колнат, Ти благословувај; нека се засрамат, кои се креваат против мене, а Твојот слуга нека се радува!

²⁹Нека се облечат со срам моите тужители, и со засраменост нека се покријат како со покривало!

³⁰Ќе Го славам Господа со сета уста и ќе Го фалам во големо мноштво,

³¹зашто стои оддесно на сиромашниот, за да му ја спаси душата од судиите.