Read Библија, Константинов Псалми 115 Bible Online

Псалми 115 - Библија, Константинов bible

Псалми 115

¹Не нам, Господи, не нам, туку на Твоето Име дај му Слава, заради Твојата милост и вистина.

²Зошто да зборуваат многубошците: „Каде е сега нивниот Бог?”

³Нашиот Бог е на небесата, прави сè што ќе Му се допадне.

⁴Нивните идоли се сребро и злато, дело на човечките раце.

⁵Уста имаат, а не говорат; очи имаат, а не гледаат;

⁶уши имаат, а не слушаат; ноздри имаат, а не мирисаат;

⁷раце имаат, а не фаќаат; нозе имаат, а не одат; глас не излегува од нивното грло.

⁸Такви се и оние, што ги направија, и сите кои се надеваат на нив.

⁹Израелев доме, надевај се на Господа! - Тој е нивни штит и помошник.

¹⁰Аронов доме, надевај се на Господа! Тој е нивни штит и помошник.

¹¹Почитувачи Господови, надевајте се на Господа! Тој е нивни штит и помошник.

¹²Господ ќе си спомни за нас, и Тој ќе нè благослови: ќе го благослови Израелевиот дом, ќе го благослови Ароновиот дом,

¹³ќе ги благослови оние, кои се бојат од Господа, и малите и големите.

¹⁴Да ве намножи Господ, вас и вашите синови!

¹⁵Да ве благослови Господ, Кој ги создаде небото и земјата!

¹⁶Небесата се Господови небеса, а земјата им ја даде на човечките синови.

¹⁷Не, мртвите не Го фалат Господа, никој од оние, што слегоа во тишина.

¹⁸Но ние, ние Го славиме Господа, сега и довека. Алилуја!