Read Библија, Константинов Псалми 135 Bible Online

Псалми 135 - Библија, Константинов bible

Псалми 135

¹Алилуја! Фалете Го Господовото име, фалете Го, Господови слуги,

²Кои престојувате во Господовиот дом, во дворовите на Домот на нашиот Бог!

³Фалете Го Господа, зашто Господ е благ, пејте Му на Неговото Име, зашто тоа е мило.

⁴Зашто Господ го избра Јакова за Себеси, Израел за драга сопственост.

⁵Знам дека Господ е Велик, дека е Господар над сите богови.

⁶Што и да Му се допадне на Господа, тоа го прави на небото и на земјата, во морето и во бездните.

⁷Облаци крева од крајот на земјата, му создава молњи на дождот, го вади ветрот од неговите засолништа.

⁸Тој ги погуби првородените во Египет, луѓето и добитокот еднакво.

⁹Тој испрати знаци и чудеса сред тебе, Египете, против фараонот и сите негови слуги.

¹⁰Тој погуби многу народи и погуби моќни цареви:

¹¹аморејскиот цар Сихон, и васанскиот цар Ог, и сите ханаански царства.

¹²И му ја даде нивната земја во наследство, во наследство на Израел, на Својот народ.

¹³Твоето име, о Господи, останува довека, и споменот за Тебе, о Господи, од род до род.

¹⁴Затоа Господ ќе го суди Својот народ, Тој им е милостив на Своите слуги.

¹⁵Незнабожечките идоли, се сребро и злато, тие се дело на човечки раце:

¹⁶имаат уста, а не зборуваат; имаат очи, а не гледаат,

¹⁷имаат уши, а не слушаат; и нема здив во нивните усти.

¹⁸Такви се и оние што се надеваат на нив.

¹⁹Израелев Доме, благословувај Го Господа! Аронов Доме, благословувај Го Господа!

²⁰Левиев Доме, благословувај Го Господа! Кои се боите од Господа, благословувајте Го Господа!

²¹Благословен да биде Господ од Сион, кој живее во Ерусалим. Алилуја!