Read Библија, Константинов Псалми 140 Bible Online

Псалми 140 - Библија, Константинов bible

Псалми 140

¹За началник на пејачи. Давидов псалм. Избави ме, Господи, од злобен човек, заштити ме од човек насилник;

²од оние што измислуваат зла во срцето, и цел ден се собираат за бој.

³Како змии ги изоструваат своите јазици, змијски отров им е под усните.

⁴Спаси ме, Господи, од раката на злосторникот, чувај ме од човек насилник, кој сака мојата нога да се сопне.

⁵Гордите ми поставуваат потајна стапица, со јажиња плетат мрежа, крај патот ми поставуваат клопки.

⁶Извикав кон Господа: „Ти си мој Бог! послушај го, о Господи, викот на моите молитви!

⁷Господи, мој Господи, мој силен Спасителе, засолни ми ја главата во денот на бој!”

⁸Не оставај да се исполни желбата на злотворот, не оставај тој да ги изврши своите намери, за да не се издигне!

⁹Нека не подигнат глава оние што ме опколија, нека падне врз нив злобата на нивните усни!

¹⁰Нека паѓаат врз нив распалени јаглења, нека паднат во јами, за да не станат повеќе!

¹¹Клеветникот не ќе се одржи на земјата, несреќата ќе го грабне одненадеж насилникот.

¹²Знам дека Господ ќе му даде право на бедниот и правда на сиромашниот.

¹³Навистина, праведните ќе го слават Твоето име, непорочните ќе престојуваат пред Твоето лице.