Read Библија, Константинов Псалми 144 Bible Online

Псалми 144 - Библија, Константинов bible

Псалми 144

¹Давидов псалм. Благословен да биде Господ, мојата карпа, Кој ми ги учи рацете за бој, а прстите за војна.

²Тој е моја љубов и моја тврдина, моја заштита, мој Избавител, мој штит зад кој се засолнувам; Тој ги покорува народите под моите нозе!

³О Господи, што е човекот, за да обрнеш внимание кон него? Што е човечкото чедо, за да си спомнуваш за него?

⁴Човекот е сличен на здивот, неговите денови исчезнуваат како сенка.

⁵Господи, наведни ги Твоите небеса и слези, допри се до планините: и ќе се зачадат!

⁶Светни со секавицата и распрсни ги, оптегни ги стрелите и збуни ги!

⁷Испружи ја раката од висините, истргај ме и спаси ме од бескрајните води, од рацете на туѓите синови:

⁸нивната уста зборува суета, а десницата им е десница на неправда.

⁹Ќе Ти пеам, Боже, нова песна, ќе ти свирам псалтир со десет жици.

¹⁰Ти им даваш победа на царевите, Ти, Кој го спаси Својот слуга Давид од лош меч!

¹¹Ослободи ме и избави од туѓински раце: нивната уста зборува лаги, а десницата им е десница на неправда.

¹²Дај ни: нашите синови да бидат како билки, што растат од својата младост; а нашите ќерки како крајаголни столбови; убави како храмовите столбови.

¹³Нашите житници да бидат полни, со секакви плодови во изобилство; нашите овци да се плодат со илјади, десетици илјади, да се плодат бескрајно по нашите полиња.

¹⁴Нашиот добиток да биде згоен! Да нема пробој ни ропство, ни плач по нашите улици.

¹⁵Блажен е оној народ, кој го има тоа; блажен е оној народ, кому Господ е Бог!