Read Библија, Константинов Псалми 30 Bible Online

Псалми 30 - Библија, Константинов bible

Псалми 30

¹Псалм; песна при обнова на Домот Давидов. Ќе Те возвишам Господи, зашто ме издигна и не ги остави моите непријатели да се радуваат над мене.

²Господи, Боже мој, Те повикав и Ти ме исцели;

³Господи, ја извади мојата душа од Подземјето и ме оживеа на работ на гробот.

⁴Пејте Му на Господа, Негови избраници, и восфалете Го Неговото свето име!

⁵Зашто Неговиот гнев трае само еден миг, а Неговата добрина - цел живот. Плачот доаѓа навечер, а радоста наутро.

⁶И јас реков во својата среќа: „Никогаш нема да се поколебам!”

⁷О Господи, со Својата добрина, Ти ме постави на гората на надежта, но штом ќе го скриеш Твоето лице, целиот се уплашувам.

⁸Тогаш, Господи, извикав кон Тебе, и Го помолив Господа:

⁹„Каква полза од мојата крв, каква корист ако слезам в гроб? Зар правта ќе те слави и ќе ја проповеда Твојата вистина?”

¹⁰Послушај Господи, и смилувај ми се; Господи, биди ми помошник!

¹¹Го обрна мојот плач во играње, ја симна од мене вреќата и ме препаша со радост.

¹²Затоа мојата душа Ти пее и нема да молкне: Господи, Боже мој, Ќе Те фалам довека!