Read Библија, Константинов Псалми 31 Bible Online

Псалми 31 - Библија, Константинов bible

Псалми 31

¹За првиот певец. Давидов псалм.(Во време на неволја) На Тебе се надевам, Господи, да не се засрамам никогаш: Избави ме според Својата правда!

²Приклони го кон мене Своето уво, побрзај да ме ослободиш! Биди ми цврста карпа на заштитата, тврдина на спасението.

³Зашто Ти си моја карпа, моја тврдина, заради Твоето име води ме и управувај ме.

⁴Извлечи ме од мрежата што ми ја поставија тајно, зашто Ти си моја крепост.

⁵Во Твојата рака го предавам мојот дух; Ти ме откупи, Господи, Боже на вистината.

⁶Ги мразам оние што ги почитуваат суетните идоли, а јас се надевам на Господа.

⁷Ќе се радувам и ќе се веселам во Твојата милост; зашто Ти ја виде мојата неволја, ја позна тагата на мојата душа

⁸и не ме предаде во рацете на непријателите, ги изведе моите нозе на широк пат.

⁹Смили ми се, Господи, зашто сум на тесно, од тага ми слабеат окото, душата и телото.

¹⁰Мојот живот се троши во горчила, а моите години во воздишки. Силата ми се исцрпи во мака, а моите коски изнемоштеа.

¹¹На сите свои противници им станав понижување, за потсмев на своите соседи и страшило за познатите; кои ме гледаа надвор, бегаа од мене.

¹²Бев заборавен во срцето, како покојник, станав скршен сад.

¹³Слушам шепотење на мнозина, ужас отсекаде: се договараат против мене и смислуваат како да ми го одземат животот.

¹⁴А јас, Господи, на Тебе се надевам, велам: „Ти си мој Бог!”

¹⁵Моите денови се во Твојата рака: избави ме од раката на моите непријатели и од оние кои ме гонат.

¹⁶Нека светне Твоето лице на Твојот слуга, спаси ме со Твојата милост.

¹⁷Господи, да не се засрамам дека Те повикав; нека се засрамат нечесните; нека молкнат во Подземјето.

¹⁸Нека онемат лажливите усни, што против праведникот зборуваат дрско, горделиво и презирно.

¹⁹О колку е голема Твојата добрина, што ја чуваш за оние, кои се бојат од Тебе, што им ја укажуваш на оние, кои се надеваат на Тебе, пред очите на човечките чеда.

²⁰Ги засолнуваш под штитот на Своето лице од човечките завери; ги криеш во Својот шатор од зајадливи јазици.

²¹Благословен да е Господ, зашто ми ја јави својата чудесна милост, во утврдениот град.

²²Веќе помислував, во својата тревога: „Отфрлен сум од Твојот поглед.” Но Ти го чу гласот на мојата молба, кога Те повикав.

²³Љубете Го Господа сите Негови свети; Господ ги чува Своите верни, а според заслугата им враќа на оние, кои постапуваат гордо.

²⁴Бидете храбри и Тој ќе ви ги укрепи срцата, сите, кои се надевате на Господа!