Read Библија, Константинов Псалми 34 Bible Online

Псалми 34 - Библија, Константинов bible

Псалми 34

¹Давидов псалм. Кога тој се престори безумен пред Авимелех, кој го истера па така се оддалечи. Ќе Го благословувам Господа во секое време, Неговата пофала секогаш ќе ми биде во устата!

²Мојата душа ќе се фали со Господа: нека го чујат тоа скромните и нека се радуваат!

³Величајте Го Господа со мене, заедно да Го возвишиме Неговото име!

⁴Го барав Господа и Тој ме послуша, ме избави од сите мои стравови.

⁵Погледнаа во Него и им светна пред очите, и не ќе се засрамат лицата нивни!

⁶Бедниот вика, и Господ го чу, го избави од сите негови неволји.

⁷Господов ангел се настанува околу оние што се бојат од Него, и ги избавува.

⁸Вкусете и видете колку е добар Господ: блажен е човекот, кој се надева на Него!

⁹Бојте се од Господа, вие Негови свети, зашто нема скудност за оние што се бојат од Него.

¹⁰Младите лавови трпат беда и гладуваат, а кои Го бараат Господа не трпат оскудица.

¹¹Дојдете, чеда, и послушајте ме, ќе ве научам на страв од Господа.

¹²О, човеку! љубиш ли го животот? Сакаш ли многу денови, за да видиш добро?

¹³Воздржувај го својот јазик од зло и своите усни од лажно зборување!

¹⁴Отстранувај се од злото и прави добро, барај мир и врви по него!

¹⁵Господовите очи ги гледаат праведните, Неговите уши го слушаат нивниот вик.

¹⁶Господовото лице се свртува против злосторниците, за да им го сотре споменот на земјата.

¹⁷Праведниците викаат, а Господ ги слуша, ги избавува од сите нивни беди.

¹⁸Господ е близу до оние што се со скрушени срца, и ги спасува оние, што се со покајнички дух.

¹⁹Праведникот има многу неволји, но Господ го избавува од сите.

²⁰Тој ги чува сите негови коски, ниту една од нив нема да му се скрши.

²¹Злото ќе го убие безбожникот, ќе платат тие што го мразат праведникот.

²²Господ ја избавува душата на Своите слуги и ниеден, од оние што се надеваат на Него, нема да биде осуден.