Read Библија, Константинов Псалми 51 Bible Online

Псалми 51 - Библија, Константинов bible

Псалми 51

¹За началникот на пејачите. Давидов псалм. Кога пророкот Натан дојде при него, откако Давид беше при Витсавеа. Смили ми се Боже, според Твоето милосрдие, според големите помилувања избриши го моето беззаконие!

²Измиј ме целиот од мојата вина, очисти ме од мојот грев.

³Зашто го признавам своето беззаконие, мојот грев е секогаш пред мене.

⁴Тебе, само Тебе, Ти згрешив и направив што е зло пред Тебе: ќе бидеш праведен кога ќе проговориш, кога ќе пресудиш без прекорување.

⁵Еве, грешен сум веќе роден, во грев ме зачна мојата мајка.

⁶Ете, Ти љубиш искрено срце, ме учиш на мудрост во длабочината на душата.

⁷Пороси ме со босилек, за да се очистам, измиј ме и ќе бидам побел од снегот!

⁸Дај ми да чујам радост и веселба, за да се зарадуваат скршените коски!

⁹Заврти го лицето од моите гревови, избриши го сето мое беззаконие!

¹⁰Боже, создај ми чисто срце, и постојан дух обнови во мене!

¹¹Не ме отфрлај од Твоето лице и не одземај го Твојот Свет Дух од мене!

¹²Врати ми ја радоста на Своето спасение и поткрепи ме со слободен дух!

¹³Ќе ги научам беззакониците на Твоите патишта и грешниците ќе Ти се обратуваат.

¹⁴Ослободи ме од пролеаната крв, Боже, Боже, Спасителе мој! Нека мојот јазик се зарадува за Твојата правда.

¹⁵Господи, отвори ги моите усни, и мојата уста ќе ја разгласува Твојата фала.

¹⁶Не Ти се мили жртви, кога би принесувал паленица, Ти не би ја примил.

¹⁷Смирениот дух е жртва на Бога, нема да го презреш, Боже, понизното и покајничко, срце.

¹⁸Биди му милостив на Сион со Својата добрина, и пак изгради ги ерусалимските ѕидови.

¹⁹Тогаш ќе Ти бидат мили праведните жртви, приноси и паленици, и тогаш ќе бидат принесувани телиња на Твојот жртвеник.