Read Библија, Константинов Псалми 55 Bible Online

Псалми 55 - Библија, Константинов bible

Псалми 55

¹За началникот на пејачите, на жичани, инструменти. Давидово учење. Послушај ми ја Боже, молитвата, не криј се од мојата молитва:

²Внимавај на мене и услиши ме! Се измачувам во својата тешкотија,

³ме збуни викотницата на непријателите и грешничкото угнетување. Се нафрлија врз мене со беззаконие, бесно ме гонат.

⁴Срцето ми трепери и смртен страв ме опфати.

⁵Страв и трепет дојдоа на мене и ужас ме обзеде.

⁶Извикав: „О да имав крилја гулабови, ќе одлетав и ќе се одморев!

⁷Ете, би летал далеку, далеку, ќе се настанев во пустината;

⁸бргу ќе побарав засолниште од бесна бура и од виорот.”

⁹Збуни ги, Господи, изметкај им ги јазиците, зашто гледам насилство и препирка во градот:

¹⁰Дење и ноќе кружат по ѕидиштата, беззаконија и неволји има во него.

¹¹Среде него: заседа, неправдата и подлоста не заминуваат од неговите улици.

¹²Ако ме укореше непријателот, тоа би го претрпел; да се кренеше против мене оној, што ме мрази, би се скрил пред него.

¹³Но, тоа беше ти, ти еднаков со мене, мој пријател, мој довереник,

¹⁴со кого другарував слатко и одевме сложно во Божјиот дом.

¹⁵Смртта нека ги најде одненадеж, нека слезат живи во Подземјето, зашто пакоста им е во живеалиштето и во срцето.

¹⁶А јас ќе Го повикам Бога и Господ ќе ме спаси.

¹⁷Навечер, наутро и на пладне ќе плачам тажно, и Тој ќе го чуе мојот глас.

¹⁸Ќе ми даде мир од оние што ме гонат: зашто се мнозина против мене.

¹⁹Бог ќе чуе и ќе ги понизи, Оној, Кој царува од векови, зашто не се поправаат, не се бојат од Бога.

²⁰Креваат раце на пријателите, го нарушуваат својот завет.

²¹Устата им е помека од маст, а срцето за војна спремно; зборовите понежни од масло, а тие се извлечени мечеви.

²²Довери Му ја на Господа сета своја грижа и Тој ќе те поткрепи: не ќе остави никогаш да се сопне праведникот.

²³А нив, Боже, фрли ги во гробната јама! Крвопијците и измамниците не ќе доживеат половина од дните! А јас се надевам на Тебе!