Read Библија, Константинов Псалми 6 Bible Online

Псалми 6 - Библија, Константинов bible

Псалми 6

¹На пејачкиот началник, со осум-жичена свирка. Давидов псалм. Господи, не ме изобличувај во Својата лутина, ниту ме казнувај во Својот гнев.

²Смилувај ми се, Господи, зашто сум изнемоштен, Господи, исцели ме, зашто моите коски треперат.

³Исто и мојата душа е силно потресена; а Ти Господи до кога?

⁴Врати се, Господи, избави ми ја душата; спаси ме заради Твојата милост,

⁵зашто во смртта не спомнуваат за Тебе; кој ќе Те слави во Подземјето?

⁶Се заморив од своите воздишки; секоја ноќ ја залевам со плачење својата постела; со солзи го натопувам своето легло.

⁷Моето око гасне и слабее од жалост, зашто се многу моите непријатели.

⁸Отстапете од мене сите, што правите беззаконие зашто Господ го чу мојот плач.

⁹Господ ја чу мојата молба; Господ ја прими мојата молитва!

¹⁰Нека се засрамат и нека се збунат сите мои непријатели; нека се вратат назад, нека се засрамат веднаш!