Read Библија, Константинов Псалми 65 Bible Online

Псалми 65 - Библија, Константинов bible

Псалми 65

¹За началник на пејачи. Давидов псалм за пеење. Боже, Тебе Ти припаѓа песна на Сион, пред Тебе се исполнува заветот -

²Ти ја послушуваш молитвата. Секое тело доаѓа при Тебе.

³Нашите гревови натежнаа, нашите престапи Ти ги очистуваш.

⁴Блажен кого го избра и го зеде при Себе: тој живее во Твоите дворови. Да се наситиме со благата на Твојот дом и со светоста на Твојот Храм.

⁵Чудесно нè услишуваш во Својата правда, о Боже, наше спасение, надеж на сите краишта на светот и на далечните мориња.

⁶Ги утврдуваш планините со Својата јачина, препашан со сила.

⁷Ги скротуваш: шумот на морето, шумот на брановите и вревата на народите.

⁸Оние што живеат на крајот на земјата, се плашат од Твоите знаци; ги полниш со радост утрата и вечерите.

⁹Ти ја посетуваш земјата и Ти ја напојуваш, ја збогатуваш неа многу. Божјата река се наполни со вода, Ти им обезбедуваш жито на луѓето. Вака ја подготви земјата:

¹⁰и ги напојуваш браздите, и ги израмнуваш грутките; ја размекнуваш со дожд, и ги благословуваш посевите.

¹¹Ти ја овенча годината со Својата благост, плодност никнува зад Твоите стапалки.

¹²Пустинските пасишта капат од изобилство, ридовите се препашуваат со радост.

¹³Ливадите се китат со стада, долините се покриваат со жито; насекаде радосни воскликнувања, песна.