Read Библија, Константинов Псалми 73 Bible Online

Псалми 73 - Библија, Константинов bible

Псалми 73

¹Асафов псалм. Бог е навистина добар кон Израел, кон оние што имаат чисто срце!

²А мене, за малку, ќе ми се сопнеа нозете, за малку ќе ми се лизнеа чекорите,

³Зашто им завидев на злочинците, набљудувајќи го напредокот на грешниците.

⁴Никакво страдање не носат, нивното тело е дебело.

⁵Не живеат во маките на смртниците, не ги удираат човечките неволји.

⁶Затоа гордоста е ѓердан на нивниот врат, а насилството облека што ги покрива.

⁷Од здебеленоста им испакнуваат очите, таа се прелева во срцето.

⁸Тие се потсмевнуваат и зборуваат злобно, со насилства се закануваат одозгора.

⁹Со устата се нафрлаат врз небото, а нивниот јазик ја обиколува земјата.

¹⁰Затоа мојот народ се враќа и пие изобилно вода,

¹¹Па велат: „Од каде знае Бог? Сознава ли Сèвишниот?”

¹²Ете, такви се грешниците: секогаш спокојни, збираат богатство.

¹³И така, дали само јас го чував напразно моето срце чисто и ги миев рацете во невиност.

¹⁴Кога примав удари секој ден, и казна утро по утро?

¹⁵Да речев: „Ќе зборувам како нив,” ете, би бил предавник на родот на твоите синови.

¹⁶И размислував како да го сознаам тоа: но ми се гледаше мачно во моите очи,

¹⁷сè додека не најдов влез во Божјото Светилиште, и го согледав каков им е свршетокот.

¹⁸Навистина, Ти ги поставуваш на лизгава патека, ги обрнуваш во пропаст!

¹⁹Како одеднаш, тие стигнаа во запустување, погинаа, исчезнаа од ужаси!

²⁰Како што човекот го презира сонот, кога ќе се разбуди, така Господи, ќе го презреш нивниот лик, штом станеш.

²¹Кога мојата душа беше јадосана, а бубрезите прободени,

²²Бев безумник без разбирање, како животинче пред Тебе.

²³Но отсега секогаш ќе бидам со Тебе, зашто Ти ја прифати мојата десница:

²⁴ќе ме водиш според Твојот совет, за да ме земеш потоа во Својата слава.

²⁵Кого имам јас на небо, освен Тебе? Кога сум со Тебе, ништо не сакам на земјата.

²⁶Премалени ми се телото и срцето: Стено на моето срце, и мое наследство, о Боже, довека!

²⁷Вистина, ќе пропаднат оние, што се оддалечуваат од Тебе, го истребуваш секој, што ќе Те изневери.

²⁸А за мене милина е да бидам во Божја близина, да имам свое засолниште во Тебе, Господи Боже. Ќе ги проповедам сите Твои дела.