Read Библија, Константинов Псалми 77 Bible Online

Псалми 77 - Библија, Константинов bible

Псалми 77

¹За првиот пејач, по Идитум. Асафов псалм. Викам кон Бога, со мојот глас, мојот глас се издига кон Бога, и Тој ме слуша.

²Во ден на неволја Го барам Господа, ноќе, мојата рака се испружува неуморно, мојата душа не сака да се утеши.

³Си спомнувам за Бога и воздивнувам; кога размислувам ми го снемува здивот.

⁴Ги држиш моите клепки, потресен сум, не можам да зборувам.

⁵Размислувам за древните дни и се сеќавам за минатите години;

⁶се сеќавам, ноќе, на мојата песна, размислувам во срцето, и мојот дух испитува:

⁷„Дали Господ ќе отфрли засекогаш и дали ќе биде, кога и да е, уште милостив?

⁸Дали прекрати Неговата милост засекогаш, пропадна ли Неговото ветување за сите поколенија?

⁹Заборави ли Бог да биде благодатен, или гневен ја затвори Својата милост?”

¹⁰И говорам: „Ова е мојата болка: се измени десницата на Сèвишниот.”

¹¹Си спомнувам за Господовите дела, се сеќавам за Твоите древни чудеса.

¹²Ги набљудувам сите Твои дела, го разгледувам она што го направи.

¹³О Боже, свет е Твојот пат; кој бог е толку голем како нашиот Бог?

¹⁴Ти си Бог, Кој твориш чудеса, врз народите ја покажа Својата сила.

¹⁵Со мишката го избави Својот народ, Јакововите и Јосифовите синови.

¹⁶Водите Те видоа, Боже, водите Те видоа и се повлекоа, бездните се разбрануваа.

¹⁷Облаците истурија поројни води, облаците зататнија со гром, и Твоите стрели полетаа.

¹⁸Твојот грмеж се заори во виорот, секавиците ја осветлија вселената, земјата се стресе и се разниша.

¹⁹Низ морето Тебе Ти се отвори пат и Твојата патека низ големи води, а Твоите траги никој не ги виде.

²⁰Ти го водеше Твојот народ, како стадо, со рацете на Мојсеја и на Арона.