Read Библија, Константинов Псалми 79 Bible Online

Псалми 79 - Библија, Константинов bible

Псалми 79

¹Асафов псалм. Боже, незнабожците, ете, навлегоа во Твоето наследство, го запустија Твојот Свет Храм, го претворија Ерусалим во урнатини.

²Мртвите тела на Твоите слуги им ги дадоа за храна на небесните птици, месото на Твоите свети на земските ѕверови.

³Им ја пролеваа крвта како вода околу Ерусалим, и немаше никој, за да ги погребе.

⁴Станавме за срам пред своите соседи, присмев и ругање за сите околу нас.

⁵До кога уште, Господи? Зар ќе се гневиш секогаш? Зар Твојата ревност ќе гори како оган?

⁶Излеј го гневот врз незнабожците, што не Те признаваат, и врз царствата што не го повикуваат Твоето име!

⁷Зошто го изедоа Јакова и го опустија неговото престојувалиште.

⁸Не спомнувај си, против нас, за беззаконијата на татковците, нека нè испревари Твојата милост, зашто сме јадни и неволни.

⁹Помогни ни, Боже, наше спасение, заради славата на Своето име, ослободи нè и прости ни ги гревовите заради Своето име!

¹⁰Зошто незнабожците да зборуваат: „Па каде е нивниот Бог?” Нека се покаже врз многубожците, пред нашите очи, како ја одмаздуваш пролеаната крв на Своите слуги!

¹¹Нека стигнат до Тебе воздишките на затворениците, со силата на Своите мишки запази ги осудените на смрт!

¹²А на нашите соседи врати им ја седмократно, во пазувите, хулата што Ти ја нанесоа Тебе, о Господи!

¹³А ние, Твојот народ и овци на Твоето пасиште, ќе Те славиме довека, ќе ја разгласуваме Твојата фала, од род на род!