Read Библија, Константинов Псалми 80 Bible Online

Псалми 80 - Библија, Константинов bible

Псалми 80

¹За началник на пејачи. На свиралката: Шошаним-Едут. Асафов псалм. Израелев Пастиру, послушај, Ти што го водиш Јосифа, како стадо овци! Ти што седиш над херувите, заблескај.

²Пред Ефрема, Венијамина и Манасија: разбуди ја Својата сила, дојди ни напомош!

³Боже, обнови нè, разведри го Своето лице и спаси нè!

⁴Господи, Боже над Воинствата, до кога ќе пламнуваш, иако Твојот народ се моли?

⁵До кога ќе нè храниш со лебот на солзите, и ќе нè напојуваш изобилно со солзи?

⁶До кога нашите соседи ќе се препираат за нас, и ќе ни се ругаат нашите непријатели?

⁷Боже над Воинствата, обнови нè, разведри го Своето лице и спаси нè!

⁸Ти ја пренесе лозата од Египет, ги истера нечистите, а неа ја засади.

⁹Ти и подготви почва, и таа пушти корења и ја наполни земјата.

¹⁰Сенката и ги покри бреговите, гранките и станаа како Божји кедрови.

¹¹Своите млади прачки ги испружи до морето и своите ластари до Реката.

¹²Зошто и ја сруши оградата, за да ја берат сите што минуваат патем,

¹³да ја запустува дивинита од гората, да ја пасат полските ѕверови?

¹⁴Врати се, Боже над Воинствата, погледај од небото и види, посети го ова лозје:

¹⁵заштити го тоа што го засади Твојата десница, синот кого го воспита за Себеси!

¹⁶Тие што ја изгореа и исекоа, нека загинат од заканувањето на Твоето лице!

¹⁷Твојата рака нека биде над човекот на Твојата десница, над човечкиот син, кого го воспита за Себеси!

¹⁸Не ќе се одметнуваме повеќе од Тебе; поживи нè, а ние ќе го повикуваме Твоето име.

¹⁹Господи, Боже над Воинствата, обнови нè! разведри го Своето лице и спаси нè!