Read Библија, Константинов Псалми 9 Bible Online

Псалми 9 - Библија, Константинов bible

Псалми 9

¹За пејачкиот началник, според напевот: „Умри за синот!” Давидов псалм. Ќе Те славам, Господи, со целото свое срце; ќе ги раскажувам сите Твои чудесни дела!

²Ќе се радувам и ќе се веселам во Тебе, ќе Му пеам на Твоето Име, Сèвишни!

³Моите непријатели се вратија назад, паднаа и загинаа пред Твоето лице.

⁴Зашто Ти ги заштити моето право и моето дело, Ти седна на престолот и пресуди праведно:

⁵ги изобличи народите, ги истреби нечесните, им го избриша името, за вечни векови.

⁶Непријателите исчезнаа - запустени засекогаш; Ти им ги разурна градовите - и споменот им го снема.

⁷Но Господ царува секогаш, го подготви Својот престол за судење.

⁸И ќе му суди на целиот свет со правда, ќе ги осуди народите справедливо.

⁹Господ е засолниште на угнетуваните, тврдина на спасението во тешки денови.

¹⁰Во Тебе се надеваат оние, кои го знаат Твоето Име, зашто не ги оставаш оние, кои Те барат Господи!

¹¹Пејте Му на Господа, Кој живее на Сион, разгласете ги Неговите дела меѓу народите;

¹²зашто си спомнува за нив како одмаздникот за крв, и не го заборава викањето на бедните.

¹³Смилуј ми се Господи: погледај на моето страдање од моите непријатели; Ти, Кој ме избавуваш од вратите на смртта;

¹⁴за да ги навестувам сите Твои пофалби во вратите на Сионовата ќерка, за да се радувам поради Твојата спасителна помош.

¹⁵Народите паднаа во јамата, што сами ја ископаа; стапицата што ја ставија тајно, ја фати нивната нога.

¹⁶Го познаа Господа - Тој судеше; грешникот се заплетка во сопствените дела.

¹⁷Безбожниците ќе се вратат во подземјето, сите народи што Го забораваат Бога.

¹⁸Зашто бедниот нема да биде заборавен засекогаш; ниту ќе биде изгубена засекогаш надежта на оние во неволја.

¹⁹Стани, Господи, за да не се засили човекот; народите нека бидат осудени пред Тебе!

²⁰Господи, пушти страв на нив, нека познаат народите дека се луѓе.