Read Библија, Константинов Псалми 91 Bible Online

Псалми 91 - Библија, Константинов bible

Псалми 91

¹Ти, Кој живееш под покрив на Сèвишниот, што се одморуваш во сенката на Сèдржителот,

²речи му на Господа: „Прибежиште мое! Тврдино моја! Боже мој, на Кого се надевам!”

³Зашто Тој ќе те ослободи од примката на ловецот, од гибелниот помор.

⁴Ќе те заштити со Своите крила, и ќе се засолниш под Неговите крила. Неговата вистина е штит и закрила!

⁵Не ќе се боиш од ноќен страв, ниту од стрелата што лета дење,

⁶ни од поморот, што се поткрадува во темнина, ни од гибелта што опустува напладне.

⁷И нека паѓаат илјади покрај тебе, десетици илјади до Твојата десница, но до тебе нема да се приближи!

⁸Само штом погледнеш со окото, веќе ќе ја видиш платата на грешниците.

⁹Зашто Господ е твое засолниште, го избра Сèвишниот за своја закрила.

¹⁰Нема да те најде несреќата, неволјата нема да се приближи до твојот шатор.

¹¹Зашто им заповеда на Своите ангели, да те чуваат на сите твои патишта.

¹²Ќе те носат на раце, за да не се сопнеш на камен.

¹³Со ногата ќе газиш лав и лутица, ќе ги згазиш лавчето и змијата.

¹⁴Ќе го избавам зашто ме љуби, ќе го закрилам зашто Го познава Моето име.

¹⁵Ќе Ме повика, а Јас ќе го услишам, со него ќе бидам во неволја, ќе го спасам и ќе го прославам.

¹⁶Ќе го наситам со многу денови, ќе му го покажам Моето спасение.