Read Библија, Константинов Изреки 17 Bible Online

Изреки 17 - Библија, Константинов bible

Изреки 17

¹Подобро е залаг сув леб во мир, отколку куќа со расправии, полна со печена жртва.

²Разумниот слуга владее над синот на срамот и ќе дели наследството со браќата.

³Топилницата е за сребро, а печката за златото, а самиот Господ го испитува срцето.

⁴Злочинецот ги слуша лажливите усни, а лажливецот го прислушкува погубувачкиот јазик.

⁵Кој му се потсмевнува на сиромашниот, Му се потсмевнува на неговиот Создател, и кој се радува на несреќата, не останува без казна.

⁶Внучињата се венец на старците, а синовите се слава на нивните татковци.

⁷Не му прилега на лудиот возвишена беседа, а уште помалку на началникот лажливи усни.

⁸Подарокот е драгоцен камен во очите на оној што го дава: каде и да се заврти, успева.

⁹Кој го прикрива престапот, бара љубов, а кој шири клеветнички гласови, ги скарува и најинтимните пријателите.

¹⁰Изобличувањето го притиска разумниот повеќе, отколку сто удари безумниот.

¹¹Лошиот човек оди сам по злото, но жесток гласник се испраќа против него.

¹²Подобро е да нагазиш на мечка, чии мечиња се грабнати, отколку на безумник во неговата лудост.

¹³Кој враќа зло за добро, не ќе ја отстрани несреќата од својот дом.

¹⁴Започнувањето на караница е исто како да се пушти поплава, и затоа пред да избувне караница оддалечи се!

¹⁵Кој го оправдува виновникот и кој го осудува правиот, двајцата Му се омразени на Господа.

¹⁶Зошто е богатството во рацете на безумникот за да купи мудрост со нив, кога нема разум!?

¹⁷Пријателот љуби во секое време, а во неволја станува и брат.

¹⁸Неразумниот човек дава рака и емчи пред својот ближен.

¹⁹Гревот го љуби кој ја љуби препирката, и кој ја издига високо својата врата, бара пропаст.

²⁰Опакиот во срцето не наоѓа добро, и кому јазикот му е лош, западнува во несреќа.

²¹Кој ќе роди безумник, на тага му е; а не е весел ни таткото на лудиот.

²²Веселото срце е одличен лек, а невеселиот дух ги суши коските.

²³Нечесниот прима подарок од под пазуви, за да ги искриви патиштата на правдата.

²⁴Разумниот ја има мудроста пред себе, а очите на безумниот се кон крајот на земјата.

²⁵Безумниот син е грижа на татка си и жалост на својата мајка.

²⁶Не чини да биде казнуван праведникот, а не е право ни да бидат биени благородните.

²⁷Разумниот се воздржува во своите зборови, а трпеливиот човек е благоразумен.

²⁸И глупецот се смета за мудар кога молчи, и за разумен, кога ги воздржува своите усни.