Read Библија, Константинов Изреки 2 Bible Online

Изреки 2 - Библија, Константинов bible

Изреки 2

¹Сине мој, ако ги примиш моите зборови и ги запазиш моите заповеди во себе,

²и со своето уво ја послушаш мудроста и го обратиш своето срце кон разумот;

³да, ако го повикаш разумот и извикаш кон благоразумноста;

⁴ако го бараш како сребро и трагаш по него како по скриено сокровиште -

⁵тогаш ќе го разбереш Господовиот страв и ќе го најдеш знаењето за Бога.

⁶Зашто Господ дава мудрост, од Неговата уста доаѓа знаењето и разумот.

⁷Тој им ја укажува Својата помош на праведните, штит им е на оние што одат непорочно.

⁸Зашто Тој ги штити патиштата на правдата и го чува патот на Своите свети.

⁹Тогаш ќе ги сфатиш: правдата, правосудството и верноста, а и секој добар пат.

¹⁰Зашто мудроста ќе влезе во твоето срце и знаењето ќе ја зарадува твојата душа.

¹¹Расудувањето ќе те пази тебе и разумноста ќе те чува:

¹²За да те избави од лош пат, од измамлив човек,

¹³од оние што ги оставаат патеките на чесноста, па одат по мрачни патишта;

¹⁴кои се веселат правејќи зло и ликуваат во изопаченоста на лошото;

¹⁵чии патеки се криви, и кои се опаки на своите патишта.

¹⁶За да те избави од прељубница и од туѓинка, што ласка со зборови,

¹⁷која го остава пријателот на својата младост и го заборава заветот на својот Бог.

¹⁸Зашто куќата и тоне во смрт, и нејзините патишта водат кон мртвите,

¹⁹кој влегува при неа, не се враќа никогаш, и не ги наоѓа повеќе патиштата на животот.

²⁰Затоа, оди по патот на добрите и држи се за патеките на праведниците!

²¹Зашто само праведните ќе ја населат земјата и непорочните ќе останат на неа;

²²а беззакониците ќе бидат збришани од земјата, и богохулниците ќе бидат искоренети од неа.