Read Библија, Константинов Изреки 25 Bible Online

Изреки 25 - Библија, Константинов bible

Изреки 25

¹И овие се Соломонови поуки, кои ги собраа луѓето на Езекија, царот јудејски:

²Слава Божја е да крие работа, а царската слава да ја истражува.

³Неистражливи се: небото во височината, земјата во длабочината и царевото срце.

⁴Отстрани ја згурата од среброто и ќе успее работата на златарот.

⁵Отстрани го нечесниот од пред царот и неговиот престол ќе се зацврсти во правда.

⁶Не воздигнувај се пред царот, и не седнувај на местото на големците,

⁷зашто е подобро да ти се рече: „Искачи се горе”, отколку да те понижат пред начелникот.

⁸Тоа што ти го видоа очите не го изнесувај пребргу на расправа; зашто што ќе направиш на крајот, кога ќе те засрами и твојот ближен?

⁹Реши го спорот со својот ближен, и не откривај ја тајната на друг,

¹⁰за да не те укори кој ќе чуе, и твојот углед срушен да биде.

¹¹Зборови кажани во право време, се златни јаболки во сребрени садови.

¹²Мудрецот што изобличува е златен прстен и ѓердан од тенко злато за внимателното уво.

¹³Верниот гласник, за оној што го праќа, е како снежна ладовина во време на жетва: тој ја крепи душата на својот господар.

¹⁴Кој се фали со лажлив дар, тој е како облак и ветер без дожд.

¹⁵Со воздржливост се ублажува управител, а мекиот јазик крши и коски.

¹⁶Кога ќе најдеш мед, јади умерено, за да не се прејадеш и да го изблуваш изеденото.

¹⁷Ретко влегувај во куќата на твојот ближен, да не се засити од тебе и да те замрази.

¹⁸Човек кој сведочи лажно против својот ближен, тој е како палица, и меч, и остра стрела.

¹⁹Безбожничката надеж во денот на неволјата, е како гнил заб и нога што трепери.

²⁰Како оној што соблекува облека во зимски ден или потурува киселина врз раната, таков е оној што му пее песна на ожалостено срце.

²¹Ако е гладен твојот непријател, нахрани го со леб, и ако е жеден, напој го со вода,

²²зашто така му натрупуваш жар на главата, и Господ ќе те награди.

²³Северниот ветер донесува дожд, а потајниот јазик - разгневено лице.

²⁴Подобро е да се живее под работ на покривот, отколку во заедничка куќа со препирлива жена.

²⁵Како студена вода за жедно грло, таква е добрата вест од далечна земја.

²⁶Како затрупан кладенец и заматен извор, таков е праведникот кој трепери пред нечесниот.

²⁷Да се јаде многу мед не е добро, ниту да се бара претерана слава.

²⁸Разурнат град и без ѕидови, таков е човекот, кој нема власт над себеси.