Read Библија, Константинов Изреки 26 Bible Online

Изреки 26 - Библија, Константинов bible

Изреки 26

¹Како снег лете или дожд во жетва, така не му прилега честа на безумниот.

²Како врапчето кога ќе избега и ластовичката кога ќе одлета, така и проклетството, без причина, не се исполнува.

³Камшик за коњот, узда за ослето, а прачка за плеќите на безумникот.

⁴Не одговорувај му на безумниот, според неговата глупост, за да не станеш и самиот еднаков со него;

⁵одговори му на безумниот според неговата глупост, за да не се направи сам себеси мудар.

⁶Си ги пресечува нозете и пие горчило, кој испраќа порака по безумен.

⁷Како што се трепетливите нозе на хромиот, таква е мудрата изрека во устата на безумниот.

⁸Како оној што врзува скапоцен камен за прачка, таков е оној кој му искажува чест на безумникот.

⁹Како што е трнливата гранка во рацете на пијаницата, таква е мудрата поука во устата на безумниот.

¹⁰Стрелец кој ги ранува сите минувачи: таков е оној кој го главува безумниот.

¹¹Безумникот се враќа на својата глупост, како што кучето се враќа на својата блувотина.

¹²Виде ли човек кој сам себе се прави мудар, знај, и од безумниот има повеќе надеж, отколку од него!

¹³Ленивиот вели: „Ѕвер има на патот и лав има по улиците”.

¹⁴Како што вратата се врти на своите стожери, така и мрзливиот на својата постела.

¹⁵Мрзливиот ја натопува раката во чинијата, ама не може да ја принесе до устата.

¹⁶Мрзливиот самиот се прави помудар од седуммина, кои одговараат умно.

¹⁷Пес фаќа за уши кој при поминувањето, се замешува во препирка, што не го засега него.

¹⁸Како безумниот кој фрла гламни, стрели и сее смрт,

¹⁹таков е човекот кој го измамува својот ближен и вели: „Само се шегував”.

²⁰Кога ќе ги снема дрвата, огнот гасне, и каде веќе нема клеветник, препирките стивнуваат.

²¹Јагленот е за жар и дрвата за оган, а препирачот, за да распалува препирка.

²²Клеветниковите зборови се како слатки залаци, се спуштаат до дното на утробата.

²³Ласкави усни со нечесно срце, се како сребрена глеѓ на глинен сад.

²⁴Мразачот дволичи со своите усни, а во себе носи измама;

²⁵не му верувај кога зборува со љубезен глас, зашто има седум мерзости во срцето;

²⁶иако со дволичност ја прикрива омразата, неговата нечесност ќе биде откриена на собранието.

²⁷Кој копа јама, сам паѓа во неа, и кој тркала камен, врз него ќе се навали.

²⁸Лажливиот јазик ги мрази своите жртви, ласкавата уста приготвува пропаст.