Read Библија, Константинов Изреки 27 Bible Online

Изреки 27 - Библија, Константинов bible

Изреки 27

¹Не фали се со утрешниот ден, зашто не знаеш што може денот да донесе.

²Нека те фали друг, а не твојата уста, туѓинец - а не твоите усни.

³Каменот е тежок и песокот е тежок, ама и од двете е потежок безумниковиот бес.

⁴Јароста е свирепа и гневот е жесток, но кој ќе и одолее на љубомората?

⁵Јавниот укор е подобар, отколку лажната љубов.

⁶Ударите од пријателот се искрени, а бакнежите на непријателот, изобилни.

⁷Наситената душа го презира медот, а на гладната, и сè горчливо - му е слатко.

⁸Како птица далеку од своето гнездо, таков е човекот, кој е далеку од својот роден крај.

⁹Како што маслото и мирисот го веселат срцето, така и сладоста на пријателот преку срдечен совет.

¹⁰Не оставај ги: својот пријател, ни татковиот пријател, и не влегувај во братовата куќа, кога си во несреќа; подобар е соседот во близина, отколку братот далеку.

¹¹Биди мудар, сине мој, и зарадувај ми го срцето, за да можам да му одговорам на оној, кој ме укорува.

¹²Умниот човек го забележува злото и се засолнува, а глупаците одат безгрижно и страдаат.

¹³Земи му ја облеката на оној, кој емчи за друг, и ограби го место туѓинецот.

¹⁴Кој го поздравува својот пријател гласно, а рано наутро, тоа му се смета како клетва.

¹⁵Покривот што прокиснува за време на пороен дожд и препирлива жена - едно исто се,

¹⁶кој неа ја крие, го крие ветерот и фаќа масло со десницата.

¹⁷Железо се остри со железо, и човекот го остри лицето на својот пријател.

¹⁸Кој ја чува смоквата, јаде од нејзиниот плод, и кој го чува својот господар, ќе биде почитуван.

¹⁹Како што во водата се одразува лице од лице, така и срцето го одразува човекот.

²⁰Смртта и Пропаста не можат да се заситат, а така ни човечките очи.

²¹Топилницата е за сребро и печката за злато, а човекот се познава по устата што го фали.

²²Да го истолчиш безумникот со толчник во сад за толчење со зрна, пак неговото безумство нема да го остави.

²³Грижи се внимателно за својот добиток, и грижи се за стадата,

²⁴зашто богатството не трае довека; ниту круната од колено до колено.

²⁵Кога тревата никнува и зеленило се покажува и се собира планинското билје,

²⁶тогаш јагнињата ти се за облека, и јарињата за купување на ниви;

²⁷тогаш имаш во изобилство козјо млеко за своја храна и за храна на својот дом, и за исхрана на своите прислужнички.