Read Библија, Константинов Изреки 3 Bible Online

Изреки 3 - Библија, Константинов bible

Изреки 3

¹Сине мој, не ги заборавај моите поуки, и твоето срце нека ги чува моите заповеди,

²зашто ќе ти ги продолжат деновите и годините на животот и ќе ти додадат мир.

³Нека не те оставаат добрината и верноста, обеси ги околу својот врат, запиши ги врз плочата на своето срце,

⁴така ќе придобиеш милост и добро сфаќање пред Божјите и човечките очи.

⁵Надевај се на Господа со сето свое срце и не се потпирај врз сопствениот разум.

⁶Мисли на Него на сите свои патишта и Тој ќе ги исправи твоите патеки.

⁷Не замислувај дека си мудар: Бој се од Господа и отстранувај се од злото,

⁸тоа ќе биде лек за твоето тело и поткрепа на твоите коски.

⁹Почитувај Го Господа со својот имот и со првините на сиот свој приход,

¹⁰и твоите житници ќе бидат преполни, и твоите каци ќе се прелеваат со ново вино.

¹¹Сине мој, не ги отфрлај Господовите опомени, и немој да го замразиш Неговиот укор,

¹²зашто кого Господ го љуби, него и го изобличува како таткото синот, кого го љуби.

¹³Блазе му на човекот, што ја нашол мудроста и на човекот, кој го придобил разумот.

¹⁴Подобро е да се придобие таа отколку да се придобие сребро, и таа е поголема печалба и од златото.

¹⁵Поскапоцена е од бисерите, и колку и да се твоите скапоцености, не можат да се споредат со неа.

¹⁶Долгиот живот и е во десната рака, а во левата: богатство и чест.

¹⁷Нејзините патишта се пријатни и сите нејзини патеки се полни со мир.

¹⁸Таа е дрво на живот, за оние кои се придржуваат за неа, и благословен е оној што ќе ја задржи.

¹⁹Господ ја основа земјата со мудрост и ги зацврсти небесата со умот;

²⁰со Негово знаење се отворија бездните и облаците истурија роса.

²¹Сине мој, не губи го тоа од пред очите запази ги разумот и здравото расудување;

²²и ќе биде живот на твојата душа и украс на твојот врат.

²³Тогаш без страв ќе чекориш по својот пат и твојата нога не ќе се сопнува.

²⁴Кога ќе легнеш, нема да се плашиш, и кога ќе заспиеш, ќе сонуваш слатко.

²⁵Не бој се од ненадеен страв ни од пребрзата пропаст, кога ќе ги стигне нечестивите,

²⁶зашто Господ ќе ти биде надеж и ќе ја чува твојата нога од стапица.

²⁷Не крати им добротворство на оние што имаат потреба кога можеш да го направиш тоа.

²⁸Не вели му на својот ближен: „Отиди си и дојди пак, и ќе ти дадам утре”, кога можеш веќе сега.

²⁹Не кови му зло на својот ближен, додека тој престојува без страв, кај тебе.

³⁰Не карај се без причина, со никого, ако не ти направил зло.

³¹Не завидувај му на насилникот, ниту следи ги неговите патишта,

³²зашто на Господа му се гнасни развратите, а близок е со праведните.

³³Господовото проклетство е врз домот на безбожникот, а благословот е во домот на праведникот.

³⁴На потсмевнувачите тој им се потсмевнува, а на смирените им дарува благодат.

³⁵Мудрите ќе ја наследат славата, а безумниците ќе го носат срамот.