Read Библија, Константинов Изреки 30 Bible Online

Изреки 30 - Библија, Константинов bible

Изреки 30

¹Зборови на Агур, Јаќеев син, од Маса; негово пророштво за Итиел, за Итиел и Укал.

²Да, преглуп сум за да бидам човек, и немам човечки разум.

³Не придобив мудрост, и не ги познавам знаењата на Светецот!

⁴Кој се вознесе на небо и слезе? Кој го фати ветерот во своите грсти? Кој ги собра водите во својата наметка? Кој ги постави земските краишта? Како се вика и како му се вика синот? Знаеш ли?

⁵Секое Божјо слово е испитано, Тој им е штит на оние, кои се надеваат на Него.

⁶Не додавај им ништо на Неговите зборови, за да не те изобличи и да не те смета лажлив.

⁷За две нешта те молам: не откажувај ми ги, додека не умрам:

⁸оддалечи ги од мене: суетата, и лагата; не ми давај ни сиромаштво ни богатство; храни ме со мојот насушен леб;

⁹за да не се откажам од тебе, откако ќе се наситам, и да речам: „Кој е Господ?” Или осиромашувајќи - би крадел и би го онечистил името на својот Бог.

¹⁰Не го клевети слугата пред неговиот господар, зашто би можел да те проколне, и да се најдеш виновен.

¹¹Има род кој го колне татка си и не ја благословува својата мајка!

¹²Род кој мисли за себе дека е чист, а не е измиен од своите нечистотии.

¹³Род со издигнати очи, кој ги крева високо своите клепки!

¹⁴Род чии заби се мечеви, а челустите ножеви, за да ги изеде несреќните на земјата и бедните меѓу луѓето!

¹⁵Пијавицата има две ќерки: „Дај! Дај!” Суштествуваат три ненаситни работи; и четири што не велат: „Доста!”

¹⁶Смртта, неплодната утроба, земјата што никогаш не се сити со вода, и огнот што никогаш не вели: „Доста!”

¹⁷Окото што му се потсмева на таткото и одречува послушност на мајката, ќе го исколваат поточните гаврани и ќе го изедат млади орли.

¹⁸Три нешта ми се чудни, а четвртото не го разбирам:

¹⁹орловиот пат по небото, змииниот пат по стената, патот на бродот среде морето, и патот на мажот кон девојката.

²⁰Таков е патот на прељубницата: ќе се најаде, ќе ја избрише устата и вели: „Не згрешив. „

²¹Од три нешта се тресе земјата, а четвртото не може да го трпи:

²²од роб кога ќе стане цар, и кога простиот ќе се насити леб;

²³од разведена жена кога ќе се мажи, и од слугинката, која ќе ја истисне својата господарка.

²⁴Четири нешта се мали на земјата, но се помудри од мудрите:

²⁵мравките, нејаки суштества, што лете ја приготвуваат храната за себе;

²⁶јазовците, суштества без сила; што во стена си изградуваат куќа;

²⁷скакулците, кои немаат цар, а сите одат по дружини;

²⁸гуштер, што се фаќа со рака, а проникнува во царските дворци.

²⁹Три нешта имаат убав чекор, а четвртото убаво оди:

³⁰лавот, јунак меѓу ѕверовите, што не се повлекува пред никого;

³¹петелот, што се шета смело меѓу кокошките; јарецот, што предводува стадо, и царот со својата војска.

³²Ако си лудувал гордејќи се, или си смислил зло, сложи ја раката на устата.

³³Кога се мати млекото, излегува маст, кога се притиснува носот, потечува крв, кога се поттикнува гневот, се зафаќа препирка.