Read Библија, Константинов Изреки 31 Bible Online

Изреки 31 - Библија, Константинов bible

Изреки 31

¹Зборови на Лемуил, цар на Маса, со кои го научила неговата мајка.

²Зошто, сине мој? Зошто сине на мојата утроба? Зошто, сине на моите завети?

³Не ја давај својата сила на жените, ни своите патишта на погубителките на цареви.

⁴Не е за цареви, Лемуиле, не им прилега на царевите да пијат вино, ни на главатарите опоен пијалак,

⁵за да не ги заборават законите во пијачката и да им ја изменат правдата на страдалниците.

⁶Дајте му жесток пијалак на оној што ќе пропадне, и вино на човек што е огорчен во душата.

⁷Тој ќе пие и ќе ја заборави својата беда и не ќе си спомнува веќе за својата неволја.

⁸Отворај ја својата уста за немиот, и за правото на сите несреќници што пропаѓаат.

⁹Отворај ја својата уста, суди праведно, дај им ја правдата на бедниот и неволникот.

¹⁰Кој ќе најде добродетелна жена? Таа вреди повеќе од бисери.

¹¹Мажовото срце се надева во неа, и не ќе му недостига печалба.

¹²Таа му прави добро, а не зло, во сите дни на својот век.

¹³Набавува волна и лен, и вешто работи со своите раце.

¹⁴Таа е како трговски брод: оддалеку го донесува својот леб.

¹⁵Таа станува уште во ноќта, ги храни своите домашни и им одредува работа на своите прислужнички.

¹⁶Ако забележи нива ја купува; со плодот на своите раце сади лозје.

¹⁷Со сила ги опашува своите бедра, и ги зајакнува своите мишки.

¹⁸Гледа како и напредува работата: ноќе не и гасне светилката.

¹⁹Со рацете посегнува по предилката, и со прстите го држи вретеното.

²⁰Ја отвора својата дланка на бедниот, ги испружува рацете кон оној кој има потреба.

²¹Не се бои од снегот за своите домашни, зашто за сите деца има по две облеки.

²²Сама си шие покривачи, се облекува во лен и во црвено сукно.

²³Мажот и е славен на Вратите, каде што седи со земните старешини.

²⁴Ткае платно и го продава, и дава појаси на трговецот.

²⁵Облечена е со сила и достоинство и весело гледа на иднината.

²⁶Мудро ја отвора својата уста, и побожна наука и е на јазикот.

²⁷Внимава на поведението на своите домашни, и не го јаде лебот на мрзливоста.

²⁸Нејзините синови се подигаат и ја наречуваат среќна, и нејзиниот маж ја фали:

²⁹„Многу жени беа добродетелни, но ти ги надминуваш сите.”

³⁰Миловидноста е лажлива, убавината е суетна: Жена со страв од Господа, заслужува пофалба.

³¹Дајте и од плодот на нејзините раце, и нека нејзините дела ја прославуваат на Вратите.