Read Библија, Константинов Изреки 4 Bible Online

Изреки 4 - Библија, Константинов bible

Изреки 4

¹Слушајте ја, деца, татковата поука и внимавајте за да ја сознаете мудроста,

²зашто ви давам добра наука: Не оставајте го мојот закон.

³И јас бев син на својот татко и нежен единец на својата мајка;

⁴и тој ме учеше и ми зборуваше: „Задржи ги моите зборови во своето срце, почитувај ги моите заповеди, и ќе живееш.

⁵Придобивај мудрост, придобивај разум, не ги заборавај и не отстапувај од зборовите на мојата уста.

⁶Не ја оставај, и ќе те чува; љуби ја и ќе те одбрани.

⁷Почетокот на мудроста е: придобивај мудрост за себе и со сиот свој имот придобивај разум.

⁸Величај ја и ќе те возвиши; кога ќе ја прегрнеш ќе ти донесе слава,

⁹ќе ти стави прекрасен венец на главата, и ќе ти подари славна круна.”

¹⁰Послушај, сине мој, прими ги моите зборови и ќе се умножат годините на твојот живот.

¹¹Те поучив на патот на мудроста, те вратив на правите патеки.

¹²Не ќе ти се заплеткаат чекорите кога ќе почнеш да одиш; ако се растрчаш, нема да се сопнеш.

¹³Држи се цврсто за поуката, не ја пуштај, пази ја, зашто таа ти е живот.

¹⁴Не оди по патеките на нечесните и не оди по патот на лошите.

¹⁵Остави го, не оди по него, отстранувај се од него и заобиколувај го,

¹⁶зашто тие не спијат ако не направат зло, и сонот не им иде ако не го голтнат некого.

¹⁷Зашто го јадат лебот на нечесноста и го пијат виното на насилништвото.

¹⁸А праведничката патека е како светлината на разденувањето, што е сè појасна до полниот ден.

¹⁹А патот на нечесните е како темнина, не знаат на што ќе се сопнат.

²⁰Сине мој, внимавај на моите зборови, наведни го своето уво кон моите беседи;

²¹не ги губи никогаш од пред очите, пази ги среде своето срце;

²²зашто се живот за оние кои ги наоѓаат и исцелување на сето нивно тело.

²³А над сè чувај го своето срце, зашто животот извира од него.

²⁴Држи ја далеку од себе лажливата уста, и оддалечувај ги од себе измамливите усни.

²⁵Нека твоите очи гледаат право напред, и нека твојот поглед биде секогаш прав.

²⁶Внимавај на патеката по која одиш, и нека сите твои патишта бидат постојани.

²⁷Не свртувај ни десно ни лево; држи ја својата нога далеку од злото.