Read Библија, Константинов Изреки 5 Bible Online

Изреки 5 - Библија, Константинов bible

Изреки 5

¹Сине мој, чуј ја мојата мудрост, наведни го своето уво кон мојата разумност,

²за да ја запазиш расудливоста, и твоите усни да го задржат знаењето.

³Зашто од усните на туѓа жена капе мед, и непцето и е помазно од масло,

⁴но таа најпосле е горчлива како пелин, остра како меч со две острици.

⁵Нејзините нозе слегуваат кон смртта, а чекорите и водат кон Подземјето.

⁶Таа не оди по патот на животот, патеките и се колебливи и таа не знае на каде водат.

⁷Затоа, сега послушај ме сине, и не отстапувај од зборовите на мојата уста.

⁸Твојот пат нека е далеку од неа, и не се приближувај до вратата на нејзината куќа,

⁹да не го дадеш цветот на својата младост и своите години на немилостивите;

¹⁰да не се наситат туѓинци од твојот имот, и твојот труд да не отиде во туѓа куќа;

¹¹да не ридаш на крајот кога ќе бидат истрошени телото и снагата,

¹²и да не речеш: „Ох како ја мразев поуката, и како моето срце го презираше укорот!

¹³И не го слушав гласот на своите учители, ниту го приклонив увото кон оние што ме поучуваа.

¹⁴И за малку не западнав во секакво зло, среде собирот и заедницата!”

¹⁵Пиј вода од својот извор и онаа што извира од твојот кладенец.

¹⁶Зар надвор да се разлеваат твоите извори и водните потоци да течат по улиците?

¹⁷Нека бидат тие само твои, а не и на туѓинците кои се покрај тебе.

¹⁸Нека е благословен твојот извор, и радувај се со жената на својата младост,

¹⁹нека ти е како мила срна и љубезлива кошута; нека те напојуваат нејзините гради во секое време, и нејзината љубов те восхитува непрекратно!

²⁰Па зошто сине мој би се занесувал по туѓа жена и би ги прегрнувал градите на туѓинката?

²¹Зашто пред Господовите очи се човековите патишта, и тој ги набљудува сите негови патеки.

²²Нечесниот ќе биде фатен од сопственото беззаконие и ќе го држат јажињата на неговите гревови.

²³Ќе умре зашто нема поука, ќе пропадне заради своето големо безумие.