Read Библија, Константинов Проповедник 7 Bible Online

Проповедник 7 - Библија, Константинов bible

Проповедник 7

¹Подобро е доброто име отколку скапоценото масло, и смртниот ден отколку денот на раѓањето.

²Подобро е да се влезе во куќа каде е жалост,отколку во куќа каде е гозба, зашто онаму е крајот на секој човек, и кој е жив, нека го вложи ова во срцето.

³Подобар е јадот отколку смеата,зашто срцето е радосно зад жалосно лице.

⁴Срцето на мудрите е во куќата на жалост, а срцето на безумните во куќата на веселба.

⁵Подобро е да се слуша укорот на мудриот човек, отколку да се слуша пеењето на безумните.

⁶Зашто смеата на глупиот е како крцкањето на трњето под котел, и тоа е суета.

⁷Угнетувањето ги прави мудрите - безумни, а поткупите го расипуваат срцето.

⁸Подобар е крајот на работата отколку нејзиниот почеток, и подобро е трпението од гордоста.

⁹Не брзај со гнев, зашто гневот почива во срцето на глупиот.

¹⁰Не прашувај зошто некогашните времиња биле подобри од овие, зашто тоа не е мудро прашање.

¹¹Мудроста е како скапоцено наследство и полезна е за оние врз кои свети сонцето.

¹²Бидејќи како што се сребрениците заштита, така е и мудроста; но предноста на знаењето е дека мудроста дава живот на оној што ја има.

¹³Погледај ги Божјите дела; кој може да го исправи она што Тој го искривил?

¹⁴Уживај ја среќата во среќен ден а размислувај во лош ден: Бог го создаде едното како и другото, за да не открие човекот ништо од својата иднина.

¹⁵Сè видов во својот суетен живот; праведниот пропаѓа и покрај својата праведност, а безбожникот живее и натаму и покрај својата безбожност.

¹⁶Не биди преправеден и не замислувај се дека си премудар; зошто да се уништуваш?

¹⁷Не биди прелош, и не биди безумен; зошто да умреш пред времето?

¹⁸Добро е да се придржуваш за едното, но ни другото не го испуштај од раката, зашто кој се бои од Бога, се избавува од сè.

¹⁹Мудроста на мудрецот му дава поголема сила на градот, отколку десет градоначалници.

²⁰На земјата нема праведник, кој правејќи добро никогаш не согрешил.

²¹И уште едно: не обрнувај внимание на озборувањето; можеби ќе чуеш дека твојот слуга те колнел;

²²а твоето срце знае како и ти често ги колнеше другите.

²³Сè тоа го испитав со мудроста. Мислев дека сум мудар но мудроста ми беше несфатлива.

²⁴Она што е, далеку е и длабоко, толку длабоко - кој може да го најде.

²⁵И уште еднаш се обидов да ги истражам и да ги разберам мудроста и разумот, да ја сознаам нечесноста како и глупоста, а лудоста како безумие.

²⁶Открив дека има нешто погорчливо од смртта - жената, чие срце е примка и мрежа, а рацете окови; кој Му е мил на Бога, ја избегнува, а грешникот ќе биде уловен од неа.

²⁷Ете, тоа сè го открив во сè, вели Проповедникот.

²⁸И уште барав. Но без успех. Најдов маж - еден меѓу илјада, а не најдов ниедна жена меѓу сите.

²⁹Го открив, ова: Бог го создаде човекот едноставен, а тој смислува безбројни сплетки.