Read Библија, Константинов Проповедник 8 Bible Online

Проповедник 8 - Библија, Константинов bible

Проповедник 8

¹Кој е како мудрецот? Кој уште знае да ги толкува работите? Мудроста му го разведрува лицето на човекот и го менува неговиот суров лик.

²Затоа велам: слушај ја царската повелба заради Божјата заклетва.

³Не брзај да си заминеш од присуството негово, и не биди тврдоглав кога причината не е добра, зашто тој прави како што му одговара.

⁴Зашто во царскиот збор е силата, и кој смее да го праша: „Што правиш?”

⁵Кој ги пази заповедите, не познава лоши работи, и срцето на мудрецот знае за времето и за судот.

⁶Зашто постои време и суд за сите, а злото тешко го измачува човекот.

⁷Зашто тој не знае што ќе биде; а кој може да му каже кога што ќе биде?

⁸Никој не може да го совлада духот, за да го задржи духот, ниту има власт над смртниот ден, во тоа војување нема одлагање; ниту нечесноста го избавува оној што ја прави.

⁹Го видов сè ова и внимавав со моето срце на секое дело што се прави под сонцето, кога човек владее над човек за негова несреќа.

¹⁰Натаму видов како ги носат безбожниците на гробишта, и луѓето доаѓаа и се враќаа од светото место, и беа заборавени во градот каде што правеа така. И тоа е суета.

¹¹Кога нема брза пресуда за зло дело, човечкото срце е наклонето да прави зло.

¹²И грешникот што прави зло, и стопати живее долго, јас сепак знам дека ќе бидат среќни оние кои се бојат од Бога, зашто се бојат од Него.

¹³Не, нечесниот човек нема да биде среќен и нема да ги продолжува своите денови ни како сенка, зашто не се бои од Бога.

¹⁴Но на земјата е суета, па праведниците ги стигнува според делата на нечесните, а нечестивите - според делата на праведниците. Велам и тоа е суета.

¹⁵Затоа ја славам веселбата, зашто нема среќа за човекот под сонцето, туку во јадењето, во пиењето и во насладувањата. И тоа нека го придружува во неговиот труд за време на животот што Бог му го даде под сонцето.

¹⁶Кога го насочив срцето за да ја познаам мудроста, се обидов да сфатам што се работи на земјата. Навистина, човекот не наоѓа спокојство ни дење ни ноќе.

¹⁷Го набљудувам целокупното Божјо дело: и навистина никој не може да го долови онаа што се збиднува под сонцето. Зашто колку и да се труди човек да го открие, никогаш не може да го открие. Па ни мудрецот не може да го открие тоа, иако мисли дека знае.