Read Библија, Константинов Исаија 10 Bible Online

Исаија 10 - Библија, Константинов bible

Исаија 10

¹„Тешко им на оние што издаваат неправедни закони, кои пишуваат жестоки решенија;

²кои им ја скратуваат правдата на бедните и и го одземаат правото на сиромаштијата на Мојот народ, за да ги ограбат вдовиците, за да ги опљачкаат сиромашните!

³Што ќе правите во денот на казната кога пропаста ќе дојде оддалеку? Кому ќе му прибегнете за помош, каде ќе го оставите своето богатство,

⁴за да не се наведнете меѓу робовите, за да не паднете меѓу убиените?” Покрај сè тоа, Неговиот гнев нема да се смири, Неговата рака ќе остане испружена.

⁵„Горко ти Асирецу, бичу на Мојот гнев, прачко со која замавнува Мојот гнев!

⁶Го испратив против неверен народ, на народ што ме разјари, за да го ограби и опљачка, за да го изгази како кал на улица.

⁷Но тој не мислеше така, и не судеше така во срцето, туку во срцето создаде завера за истребување на многу народи.

⁸Зборуваше: ‘Не се ли сите кнезови мои цареви?

⁹Не е ли Халан како Хархемес? Не е ли Емад како Арпад? Самарија како Дамаск?

¹⁰Како што Мојата рака го достигна царството на лажните богови, побогати со кипови од Ерусалим и Самарија,

¹¹како што направив со Самарија и со нејзините лажни богови, нема ли да направам и со Ерусалим и со неговите ликови?’”

¹²И кога Господ ќе го доврши сето Свое дело на гората Сион и во Ерусалим, ќе го казни плодот на горделивото срце на асирскиот цар и дрскоста на неговите горделиви очи.

¹³Зашто рече: „Направив со својата рака и со својата мудрост, зашто сум умен; ги отстранив границите меѓу народите и ги ограбив нивните богатства, како јунак ги симнав оние што седат на престолите.

¹⁴Мојата рака ги зграби како гнезда богатствата на народите. Како што се собираат оставените јајца, ја собрав целата земја, и немаше никој да затрепери со крилјата да отвори клун, да цивка.”

¹⁵Зар се фали секирата покрај оној што сече со неа? Ќе се гордее ли пилата покрај оној што со неа реже? Како жезолот да мавта со оној кој го крева, или прачката ја крева оној што не е дрво.

¹⁶Господ над Воинствата ќе им испрати крај на неговите згојувања, ќе му ја потпали славата со оган, како распламсан пожар.

¹⁷Израелевата светлина ќе биде како оган, Неговиот Светец како пламен што ќе го запали и ќе ги изгори неговите глогинки и неговото трње во еден ден.

¹⁸И красотата на неговите гори и овоштарници ќе ја уништи од срцевината до кората, таа ќе биде како болен што згаснува;

¹⁹ќе биде лесно да биде избројан, остатокот на горските стебла дете ќе ги запише лесно.

²⁰Во оној ден: Израелевиот остаток и преживеаните од Јакововата куќа, не ќе се потпираат веќе на оној кој ги бие, туку ќе се потпираат искрено на Господа, на Израелевиот Светец.

²¹Остатокот ќе се врати, Јакововиот остаток при силниот Бог.

²²Навистина Израеле, твојот народ и да биде колку песок во морето, само неговиот Остаток ќе се врати, одредено е уништување, правдата се прелеа,

²³Господ, Господ над Воинствата, ќе ја уништи сета земја, како што ќе одреди.

²⁴Затоа Господ над Воинствата зборува вака: „О Мој народе што престојуваш на Сион, не бој се од Асирецот кога бие со бич, кога крева стап на тебе, како и Египет.

²⁵Зашто уште малку, многу малку, и ќе прекрати Мојот гнев, Мојата јарост ќе ги уништи.”

²⁶Господ над Војските ќе замавне со бич над нив како кога го удри Мадијам при стената Орив и ќе крене стап над морето како на Египетскиот Пат.

²⁷Во оној ден: ќе ти падне бремето од плеќи, и ќе го снема неговиот јарем од твојот врат.

²⁸Тој иде од Римон, доаѓа на Ајат, преминува преку Мигрон, го симнува бремето во Михмас.

²⁹Поминуваат низ клисури, ноќевалиштето им е во Гавај; Рама трепери, Сауловата Гаваја бега.

³⁰Викај гласно, ќерко Бат Галимова! Направи го да се чуе Лаис, беден Анатоте!

³¹Мадмина побегна, гевимските жители избегаа.

³²Уште денес ќе застанам во Нов, сионските ќерки и се закануваат со рака на гората, на Ерусалимскиот Рид.

³³Ете, Господ, Господ над Војските, ги искаструва со страшна сила гранките, пресечени се највисоките врвови, најиздигнатите се снижени.

³⁴Од секирата паѓаат густите горски месности, Ливан паѓа со својата слава.