Read Библија, Константинов Исаија 2 Bible Online

Исаија 2 - Библија, Константинов bible

Исаија 2

¹Видение на Амосовиот син Исаија, за Јудеја и за Ерусалим:

²Ќе се случи на крајот на деновите: Гората на Господовиот Дом ќе биде поставена над сите гори, возвишена над сите брегови. Кон неа ќе одат сите народи,

³ќе се втурнат многу племиња и ќе речат: „Ајде, да се искачиме на Господовата Гора, да отидеме во Домот на Јакововиот Бог. Тој ќе нè научи на Своите патишта, ќе одиме по Неговите патеки.” Зашто Законот ќе дојде од Сион, Господовото слово од Ерусалим.

⁴Тој ќе им биде судија на народите, ќе им суди на многу племиња, кои ќе ги прековат мечевите во плугови, а копјата во српови. Нема повеќе народ да дига меч против народ, ниту ќе се учи веќе на војување.

⁵Јаковов доме, дојдете, да одиме во Господовата светлина!

⁶Да, Ти го отфрли Својот народ, Јакововиот дом, зашто е полн со вражалци од исток и гатачи како Филистејците, се побратимуваат со туѓинци.

⁷Земјата му е полна со сребро и злато, и нема крај на неговото богатство; земјата им е полна со коњи, нема број на неговите коли.

⁸Земјата му е преполна со идоли, и тие се поклонуваат пред делото на своите раце, пред она што го направија нивните прсти.

⁹Смртникот ќе се наведне, човекот ќе се снизи; не проштавај им.

¹⁰Влези меѓу пештерите, скриј се во правот, пред Господовиот ужас, пред славата на Неговото Величество кога ќе стане да ја растресе земјата.

¹¹Гордиот поглед ќе биде скршен, и човечкото високоумие ќе биде понижено. Господ ќе се возвиши, Единствено Тој - во оној ден.

¹²Да, тоа ќе биде ден на Господа над Војските, против сите горделиви и издигнати, против сите што се возвишуваат, за да ги собори;

¹³против сите либански кедри и против сите васански дабови;

¹⁴против сите вишнати гори и против сите издигнати брегови;

¹⁵против секоја висока тврдина, и против сите цврсти ѕидови;

¹⁶против сите тарсиски бродови, и против сите раскошни бродови.

¹⁷Човечката гордост ќе падне и човечката висина ќе се понижи. Господ ќе се возвиши, единствено Тој - во оној ден,

¹⁸и идолите на нечистите божества ќе ги снема без трага.

¹⁹Ќе влезат во дупките меѓу пештерите и во земните дупки, пред Господовиот ужас, пред сјајот на Неговото Величество, кога ќе стане да ја растресе земјата.

²⁰Во оној ден: човекот ќе им ги фрли на кртиците и лилјаците, своите сребрени идоли и своите златни идоли на нечистите божества што си ги направил за себеси, за да им се поклонува;

²¹кога ќе избега во пештерските шупливости и во распуканиците на карпите пред Господовиот страв, пред болскотот на Неговото Величество кога ќе стане да ја растресе земјата.

²²Прекратете да се надевате на човекот чиј здив е во неговите носалки: бидејќи што значи тој?