Read Библија, Константинов Исаија 24 Bible Online

Исаија 24 - Библија, Константинов bible

Исаија 24

¹Ете, Господ ја запустува земјата, ја разурнува, и го обезобразува лицето, ги распрснува нејзините жители.

²Свештеникот ќе биде како и народот, господарот како и слугата, господарката како и слугинката, продавачот како и купувачот, заемодавачот како и позајмувачот, оној што дава на заем како и должникот.

³Земјата ќе биде запустена, сосем ограбена, зашто Господ одлучи.

⁴Земјата тажи, венее, светот гине, згаснува, небото пропаѓа со земјата.

⁵Земјата е онечистена под своите жители, зашто го престапија Законот, ја изгазија одредбата, го нарушија вечниот Завет.

⁶Затоа проклетството ја проголтува земјата, нејзините жители се виновни. Затоа се изгорени земните жители и малку луѓе останаа.

⁷Виното тагува, лозата венее, воздивнуваат сите што беа со весело срце.

⁸Прекрати веселбата покрај тапаните, замре разиграната врева, прекратија веселбите покрај гуслето.

⁹Не се пие веќе вино со песни, се згорчи жестокиот пијалак.

¹⁰Суетниот град е разурнат, затворен е влезот во сите куќи.

¹¹Плач по улиците заради виното, ја снема секоја веселба, радоста е протерана од земјата.

¹²Само пустота остана во градот, со тресок се скршени вратите;

¹³зашто така се збиднува на земјата, меѓу народите, како кога ќе се соберат маслинките, или кога се дособира грозјето по гроздоберот.

¹⁴Тие го креваат гласот, воскликнуваат од радост; го возвишуваат од морето Господовото величие.

¹⁵Тие го слават Господовото Име на исток, го слават морските острови името на Господа, Израелевиот Бог.

¹⁶Од крајот на земјата ја слушаме песната: „Слава на Праведникот!” Но јас велам: „Пропаднав! Пропаднав! Тешко мене! Вероломците се изневерија со неверство, вероломците се изневерија.”

¹⁷Страв, јама, стапица, за тебе, жителу на земјата:

¹⁸Кој ќе избега пред гласот на стравот, ќе падне во јама, кој ќе се извлече од јамата ќе биде фатен од стапицата. Да, ќе ги отворам браните одозгора и ќе ги растресам основите на земјата.

¹⁹Земјата ќе се разбие грозно, земјата ќе се распука страшно, земјата ќе се стресе силно,

²⁰земјата ќе се залула како пијаница, ќе се заниша како колиба, толку ќе и стежне нејзиното беззаконие, што ќе падне и веќе не ќе стане.

²¹И ќе се случи во оној ден: Господ ќе ја казни во висината небесната војска, а на земјата сите земни цареви;

²²ќе бидат собрани и затворени во јама, затворени во темница и казнети по многу денови.

²³Месечината ќе се зацрвени, сонцето ќе се засрами, зашто Господ над Воинствата ќе царува на Сионската Гора и во Ерусалим, и Неговата слава ќе блеска пред старешините.