Read Библија, Константинов Исаија 28 Bible Online

Исаија 28 - Библија, Константинов bible

Исаија 28

¹Тешко му на горделивиот венец на Ефремовите пијаници, на блескавиот накит на овенат цвет -на оние кои врз плодниот дол лежат испијанети со вино!

²Еве, од Господа доаѓа еден силен и моќен, како пороен дожд со град, како разурнувачки виор, како истурување на облаците и поплава, и ги фрла со сета сила на земја.

³Ќе биде изгазен со нозете горделивиот венец на Ефремовите пијаници,

⁴и овенатиот цвет на неговиот блескав накит над плодните долини; ќе биде како смоква - ранка пред летото: штом некој ја забележува, веднаш ја бере.

⁵Во оној ден, Господ над Воинствата ќе му стане круна на славата и сјаен венец на Остатокот на Својот народ -

⁶Дух на правдата за оној кој седи на судска столица, и храброст за оној кој го одбива нападот на вратата.

⁷Тие се занесуваат од вино се заблудуваат од жесток пијалак: свештениците и пророците се сопнуваат од жестокиот пијалак; победени од виното; обезумени од сикер; грешат во виденијата, се сопнуваат во судењето.

⁸Сите трпези се полни со гнасни болваници, никаде нема чисто место!

⁹„Кого учи тој на мудрост, кого упатува тој во учење? Зар децата одвикнати од млеко, одбиени од градите?

¹⁰Заповед на заповед, заповед на заповед, правило на правило, правило на правило малку тука, малку таму.”

¹¹Да, со пелтечави усни и на странски јазик ќе му се зборува на овој народ.

¹²Тој ми рече: „Еве починка, оставете го заморениот да почине! Еве одмор!” Но не сакаа да послушаат.

¹³Затоа Господ ќе им зборува вака: „ Заповед на заповед, заповед на заповед, правило на правило, правило на правило малку тука, малку таму.” За да паднат задничкум одејќи, за да се скршат, да се сплеткаат и да се фатат.

¹⁴Затоа чујте го Господовото слово, вие потсмевачи, вие што владеете со овој народ, што е во Ерусалим.

¹⁵Вие велите: „Склучивме сојуз со смртта и направивме спогодба со Подземјето. Кога ќе помине разурнувачкиот бич, не, нема да нè фатат, зашто од лагата си направивме засолниште и од измамата скривалиште.”

¹⁶Затоа Господ Бог зборува вака: „Еве, поставувам одбран камен на Сион, скапоцен камен аголен, основник. Оној кој верува во него, не ќе пропадне.

¹⁷И ќе ја земам правината за мерка, а правдата за мерилка.” И градот ќе ви го смете засолништето од лагата, а водата ќе ви го наводни скривалиштето;

¹⁸ќе пропадне вашиот сојуз со смртта, вашата спогодба со Подземјето не ќе се додржи. Кога ќе помине разурнувачкиот бич, ќе ве сотре;

¹⁹кога и да помине, ќе ве дофати; ќе поминува секое утро, дење и ноќе. И само гласот за него ќе внесува страв.

²⁰Постелата ќе биде прекуса за да се испружи човек, покривката претесна за да се завитка.

²¹Да, како на гората Ферасим, Господ ќе стане, како во Гаваонската Долина, Тој ќе се разјари, за да го изврши Своето дело, чудесно дело, за да го исполни Својот наум, таинствен наум.

²²Откажете се од потсмевањето, за да не ве стегнат оковите посилно; зашто чув дека и е од Господа, од Господа над Воинствата, пресудено уништување на оваа земја.

²³Послушајте го и чујте го мојот глас, прислушнете ја внимателно мојата беседа.

²⁴Ора ли орачот секој ден, дали отвара бразди, дали влече брана во својата нива?

²⁵А кога ќе и ја израмни поврвнината, не сее ли грав, не турува ли ким? Пченица каде што треба, просо и јачмен, и најпосле ‘рж по рабовите?

²⁶Неговиот Господ го упатува, Тој го учи на вистинско дело.

²⁷Зашто гравот не се врши со брана, не со тркало врз кимот, туку гравот се врши со стап, а кимот се чука со прачка.

²⁸А дали се дроби житото? Не, не ќе го чукаш довека: врз него ќе спотераш колско тркало и коњи, но не ќе го здробиш.

²⁹И тоа доаѓа од Господа над Војските, со советот на Прекрасниот со мудроста на Великиот.