Read Библија, Константинов Исаија 43 Bible Online

Исаија 43 - Библија, Константинов bible

Исаија 43

¹Сега вака зборува Господ, Кој те создаде, Јакове, Кој те створи, Израеле: „Не бој се, зашто Јас те откупив; те повикав по име, ти си Мој!

²Кога преминуваш преку вода, со тебе Сум; или преку река, нема да те потопи. Ако тргнеш низ оган, не ќе изгориш, пламенот нема да те опали.

³Зашто Јас Сум Господ, твојот Бог, Израелев Светец, твој Спасител. Го давам Египет за твоја откупнина, ги давам Етиопија и Сева место тебе.

⁴Зашто си скапоцен во Моите очи, ценет си, и Јас те возљубив. Затоа и давам луѓе за тебе, и народи за твојот живот.

⁵Не бој се, зашто Јас Сум со тебе. Твоето потомство ќе го доведам од исток и ќе те соберам од запад.

⁶Ќе му речам на север: ‘Дај ми го!’ а на југ: ‘Не задржувај го!’ Доведи Ми ги синовите од далеку, а Моите ќерки од крајот на земјата,

⁷сите кои се наречуваат со Моето Име, и кои ги создадов за Своја Слава, кои ги створив и ги направив.”

⁸Изведи го слепиот народ, иако има очи, и глувиот, иако има уши.

⁹Нека се соберат сите племиња и нека се приберат сите народи. Кој од нив го прорече тоа и го навести одамна? Нека доведат сведоци за да се оправдаат, нека се чуе дека може да се рече: „Вистина е!”

¹⁰„Зашто вие сте Ми сведоци,” слово е Господово, „и Мои слуги кои ги избрав, за да знаете и верувате и да видите дека тоа Сум Јас. Пред Мене ниеден бог не беше направен и не ќе биде после Мене.

¹¹Јас, Јас Сум Господ, нема Спасител освен Мене.

¹²Јас прореков, спасив и навестив, и нема туѓинец меѓу вас! Вие сте Ми сведоци,” слово е Господово, „а Јас Сум Бог,

¹³од вечноста - Јас Сум! И никој не избавува од Мојата рака; што ќе направам, кој може да го измени?”

¹⁴Вака говори Господ, вашиот Искупител, Израелевиот Светец: „Заради вас испратив во Вавилон, ќе ги кутнам лостовите на затворите, и Халдејците ќе почнат да лелекаат.

¹⁵Јас Сум Господ, вашиот Светец, Израелевиот Творец, вашиот Цар!”

¹⁶Вака зборува Господ, кој направи пат по морето и патека по силните води;

¹⁷„Кој ги изведе бојните коли и коњаниците, војската и јунаците, и тие паднаа за да не се кренат веќе, згаснаа, се угаснаа како фитил:

¹⁸„Не спомнувајте си за она што се збидна, не мислете за она што помина.

¹⁹Еве, правам нешто ново; веќе се појавува. Зар не забележувате? Да, ќе направам пат во пустината, и патека во безводна земја.

²⁰Дивите ѕверови ќе Ме слават, шакалите и ноевите, зашто ќе создадам вода во пустината, реки во степата, за да го напојам Мојот народ, Мојот избраник.

²¹И народот што го создадов за себе ќе ја возвестува Мојата слава!

²²Но ти, Јакове, не Ме повика, ниту се измори околу Мене, Израеле!

²³Не Ми принесуваше јагниња за паленици, не Ме почитуваше со жртви. А Јас не те принудував за приноси, не ти здодевав барајќи кадеж.

²⁴Не Ми купуваше трска за сребреници, не Ме ситеше со салото од своите жртви; туку Ме мачеше со своите гревови, Ми здодеваше со своето беззаконие.

²⁵А Јас, заради Себе ги бришам твоите престапи, и не си спомнувам за твоите гревови.

²⁶Потсети Ме, за да се спориме заедно, зборувај Ми за да се оправдаш.

²⁷Прв згреши твојот татко, твоите посредници се одметнаа од Мене,

²⁸твоите првенци го онечистија Светилиштето. Тогаш ги предадов: Јакова на проклетство, а Израел на потсмев.