Read Библија, Константинов Левит (3 Moj.) 21 Bible Online

Левит (3 Moj.) 21 - Библија, Константинов bible

Левит (3 Moj.) 21

¹И Господ му рече на Мојсеја: „Зборувај им на свештениците, на Ароновите синови, и речи им: ‘Нека не се онечистуваат со допирање на покојник во својот народ,

²освен за свои најблиски роднини: за мајка си, за татка си, за синот, за ќерката и за братот,

³и за својата сестра, девица, која му е најблиска крвна роднина, која живее при него и не била мажена.

⁴Но нека не се онечистува за роднините и така да стане нечист.

⁵Нека не ја бричат главата; нека не ги стрижат краиштата на своите бради, ниту да прават засеци на своето тело.

⁶Нека Му бидат свети на својот Бог; нека не го обесветуваат името на својот Бог, зашто тие принесуваат палени жртви на Господа, леб на својот Бог; затоа треба да бидат свети.

⁷Нека не се женат со блудница и со обесчестена; ниту смеат да се женат со онаа, која нејзиниот маж ја отпуштил, зашто тие се свети на својот Бог.

⁸И нека биде осветен, зашто тој го принесува лебот на твојот Бог; нека ти биде свет, зашто Сум свет Јас, Господ, Кој ве осветува вас.

⁹Ако свештеничка ќерка се обесчестила со блудствување, таа го бесчести татка си; нека биде изгорена на оган.’

¹⁰‘А велесвештеникот од своите браќа, на чија глава е излеано масло за помазание и кој е осветен да носи света облека, нека не оди со откриена глава, ниту да ја раскинува својата облека.

¹¹Нека не влегува ниту при еден мртовец; не смее да се онечистува, ниту за татка си, ниту за мајка си.

¹²Нека не излегува од Светилиштето, за да не го онечисти Светилиштето на својот Бог, зашто на себе го носи венецот на маслото со помазанието на својот Бог. Јас Сум Господ.

¹³Нека зема девица за жена.

¹⁴Не смее да се жени со вдовица, или со оставена од маж, или со обесчестена или со блудница; нека се жени со девица од својот народ;

¹⁵така нема да го загади своето потомство меѓу својот народ, зашто Јас, Господ, го осветувам.’”

¹⁶Господ му рече на Мојсеја:

¹⁷„Речи му на Арона: ‘Никој од твоите потомци, во нивните родови, кои ќе имаат некаков телесен недостаток не смее да се доближи да го принесува лебот на својот Бог.

¹⁸Ниеден на кого има недостаток не смее да пристапува: ни слеп, ни хром, ни со обезличен нос, ни со излишен член;

¹⁹ни таков кој има скршена рака или нога;

²⁰ни подгрбавен, ни со сув член, ни со болни очи, ни лишав, ни јадежлив, ни килав.

²¹Ниеден човек од потомците на свештеникот Арон, кој има недостаток, нека не пристапува да принесува паленица; бидејќи има недостаток, нека не се доближува да Му принесува леб на својот Бог.

²²Може да јаде од храната на својот Бог: од светите и од пресветите жртви;

²³но нека не доаѓа кон завесата, ниту да му пристапува на жртвеникот, зашто има недостаток. Нека не ги обесветува Моите светилишта, зашто Јас, Господ, ги осветувам.’”

²⁴Мојсеј им го кажа тоа на Арона, на неговите синови и на сите Израелеви синови.