Read Библија, Константинов Левит (3 Moj.) 24 Bible Online

Левит (3 Moj.) 24 - Библија, Константинов bible

Левит (3 Moj.) 24

¹Господ му рече на Мојсеја:

²„Нареди им на Израелевите синови, да ти донесат: чисто масло од истолчени маслинки за светлина, за да гори светилникот непрекратно.

³Арон нека го подготвува секогаш пред Господа, од вечер до утро, во Шаторот на средбата, пред завесата на Сведоштвото. Ова е вечен закон за вашите поколенија.

⁴Арон нека ги одржува непрекратно светилките на чист светилник пред Господа.”

⁵„Потоа земи чисто пченично брашно и од него испечи дванаесет погачи. Во секоја погача нека има две десетини ефа.

⁶Потоа нареди ги во два реда - по шест во ред - на чистиот стол што е пред Господа.

⁷На секој ред стави чист темјан. Тоа нека биде на лебот за спомен - принос на Господа.

⁸Во секоја сабота, постојано, нека бидат положувани пред Господа од Израелевите синови: тоа е вечен Завет.

⁹Нека им припаднат на Арона и на неговите синови, кои ќе ги јадат на свето место; зашто тоа е пресвето за нив од Господовите жртви: тоа е вечна одредба.”

¹⁰А синот на една Израелка, роден од татко Египетец, излезе меѓу Израелците и зафати во логорот, караница со еден Израелец.

¹¹И синот на Израелката го похули името Господово и го проколна. Тогаш го доведоа при Мојсеја. Името на мајка му беше Саломита, Давриина ќерка, од Дановото племе.

¹²Го ставија под стража, додека не им се открие Господовата волја.

¹³И Господ му рече на Мојсеја:

¹⁴„Изведи го хулителот надвор од логорот. А сите кои го слушнаа нека ги положат своите раце на неговата глава. Тогаш целото општество нека го каменува.

¹⁵Потоа ќе им прозбориш на Израелците вака: ‘Кој ќе Го проколне својот Бог, ќе го понесе својот грев;

¹⁶кој ќе изговори хула против Господовото име, нека биде погубен - целата заедница нека го погуби со камења; било да е туѓинец или домородец, ако Го похули Господовото име, треба да умре.

¹⁷Кој ќе убие кој и да е друг човек, треба да и биде предаден на смртта.

¹⁸Кој ќе усмрти животно, треба да го надомести: животно за животно.

¹⁹Кој ќе го повреди својот ближен, нека му биде направено како што сторил тој:

²⁰скршено за скршено, око за око, заб за заб: каква повреда му направил на човекот, така да му се направи и нему.

²¹Кој ќе усмрти животно, треба да го надомести; но кој ќе убие човек, треба да умре.

²²Судот нека ви биде еднаков и за придојденикот и за домородецот, зашто Јас Сум Господ, ваш Бог.’”

²³Откако Мојсеј им го изложи тоа на Израелевите синови, го изведоа хулителот надвор од логорот и го засипаа со камења. И Израелците направија како што Господ му заповеда на Мојсеја.