Read Библија, Константинов Левит (3 Moj.) 25 Bible Online

Левит (3 Moj.) 25 - Библија, Константинов bible

Левит (3 Moj.) 25

¹Господ му рече на Мојсеја на Синајската Гора:

²„Зборувај им на Израелците и кажи им: ‘Кога ќе влезете во земјата што ви ја давам, таа земја нека ја пази Господовата саботна починка.

³Шест години сеј ја твојата нива, шест години режи го твоето лозје и бери го неговиот плод.

⁴А на седмата година и земјата нека ја ужива саботната починка, Господовата сабота: не засевај ги твоите ниви, ниту режи го твоето лозје.

⁵Што ќе порасне само од себе на твојата нива, не жнеј го; ниту го бери грозјето од нережана лозница. Тоа нека и биде на земјата година на почивање.

⁶Земјината починка ќе ве снабди со исхрана: за тебе, за твојот слуга, за твојата слугинка, за твојот наемник и за придојденецот кој живее со тебе;

⁷а и за твојот добиток и за ѕверовите во твојата земја - нејзините плодови нека служат за храна.’

⁸‘Изброј седум седмици такви години, седумпати по седум години. Седум години седмици ќе ти изнесуваат четириесет и девет години.

⁹Тогаш засвири во трубата - во седмиот месец, на десеттиот ден на месецот, на Денот на Очистувањето; затрубите во труба ширум низ сета ваша земја.

¹⁰Таа педесетта година прогласете ја за света! Прогласете низ земјата ослободување на сите нејзини жители. Тоа нека ви биде прославна, проштавачка, година: секој нека се врати во својата татковина; секој нека се врати во својот род!

¹¹Таа педесетгодишница нека ви биде јубилејна година: не сејте, не жнијте што ќе порасте само од себеси, ниту берете од нережана лоза.

¹²Зашто прославата треба да биде света. Хранете се со она што ќе донесе нивата од себе.

¹³‘Во јубилејната година секој нека се врати во своето наследство.

¹⁴Затоа, кога му продавате имот на свој сонародник или кога купувате од свој сонародник, не му нанесувајте штета на својот брат!

¹⁵Купувај од својот ближен, откако ќе го одбиеш бројот на годините на прославата; а тој нека ти продава според бројот на годините на плодособирањето.

¹⁶Колку повеќе години, зголеми ја цената; колку помалку години, и цената нека биде помала. Зашто, она што тој ти продава е број на едногодишни полски приходи.

¹⁷Нека никој од вас не му нанесува штета на својот сонародник; туку бој се од твојот Бог! Зашто Јас Сум Господ, ваш Бог!’

¹⁸‘Исполнувајте ги Моите закони и Моите наредби; спроведувајте ги верно на дело па ќе живеете безопасно на земјата.

¹⁹Земјата ќе го дава својот род, ќе јадете до наситка и ќе живеете спокојно.

²⁰Ако речете: „Со што ќе се храниме во седмата година, кога не ќе сееме, ниту ќе собираме плодови?”

²¹Јас ќе го испратам Мојот благослов на вас: шестата година ќе роди за три години.

²²Кога ќе сеете во осмата година, ќе се храните со стари плодови до деветтата година. Додека не дојдат нејзините плодови, ќе јадете стари.

²³Земјата не смее да биде продадена за секогаш, зашто земјата Ми припаѓа Мене, додека вие сте само странци и гости кај Мене.

²⁴Затоа во секој крај каде што имате земјишна сопственост, треба да дозволите откупување на земјата.’

²⁵‘Ако твојот брат осиромаши и ако продава од својата татковина, нека дојде неговиот најблизок роднина и нека го откупи она што го продава неговиот брат.

²⁶Ако нема некого да ја откупи, а после и самиот стане имотен и спечали средства за да ја откупи,

²⁷нека ги изброи годините од продавањето, нека му исплати на купувачот износ за другото време и нека се врати на своето наследство.

²⁸Ако нема средства за да ја откупи, тогаш продаденото нека остане во рацете на купувачот до јубилејната година. А кога ќе стапи во јубилејот, нека се врати на својата таткова земја.’

²⁹‘Ако некој продаде куќа за живеење во град, заграден со ѕид, може да ја откупи додека не се наполни година по продавањето; и така, откупниот рок нека е една година.

³⁰Ако не ја откупи во рок од една година, тогаш куќата, во градот заграден со ѕид, им останува за секогаш на купувачот и на неговите потомци; нека не се враќа ни при прославата.

³¹Но куќите по селата, што немаат ѕидови околу себе, нека се сметаат како недвижен имот во полето; можат да бидат откупувани. Во јубилејот купувачот треба да излезе од нив.

³²Куќите што се во левитските градови им припаѓаат на левитите; левитите можат да ги откупуваат во секое време.

³³Ако некој левит не се послужи со своето право за откуп, тогаш куќата што ќе биде продадена, во градот на неговата сопственост, ќе му биде вратена во прославата. Зашто кај Израелците куќите во градовите на левитите се нивна сопственост.

³⁴Неизградената земја околу нивните градови не може да биде продадена, зашто таа е нивна сопственост за сите времиња.’

³⁵‘Ако твојот брат осиромаши и е без средства при тебе; помагај го, како да е странец или гостин, за да може да живее со тебе!

³⁶Не земај од него ни камата ни печалба. Бој се од својот Бог, и твојот брат нека живее со тебе.

³⁷Не давај му сребро на заем со камата, ниту му ја давај твојата храна за печалба.

³⁸Јас, Господ, вашиот Бог, ве избавив од Египетската Земја за да ви ја дадам Ханаанската Земја и за да бидам ваш Бог.’

³⁹‘Ако осиромаши твојот брат, кај тебе, и ако ти се продаде, не присилувај го да ти служи како роб.

⁴⁰Нека биде кај тебе како наемник или надничар. Нека служи кај тебе до јубилејната година.

⁴¹Тогаш ослободи го да си отиде од кај тебе; самиот и неговите деца со него; нека се врати во својот род и пак нека ја земе својата дедовина.

⁴²Затоа што тие се Мои слуги, кои Јас ги изведов од Египетската Земја; не смеат да бидат продавани како робови.

⁴³Не постапувај грубо со нив и бој се од твојот Бог!

⁴⁴А ако сакаш да имаш робови и робинки, можете да ги купите, и машки и женски, од народите што се околу вас.

⁴⁵Можете да ги купувате и од придојдениците, кои се населени меѓу вас; од нивните семејства што живеат со вас и што се родени во вашата земја. Таквите можат да станат ваша сопственост.

⁴⁶Нив можете да им ги предавате во наследство на вашите деца, за да ги наследат за секогаш во сопственост. Кон нив можете да постапувате како кон робови. Но кон своите браќа, Израелевите синови, никој не смее да господари со жестокост.’

⁴⁷‘Ако туѓинецот или придојденикот, кој живее со тебе, се збогати, а твојот брат осиромаши кај него, па ако му се продаде на странецот, кој живее со тебе, или на кој и да е потомок на семејството на придојденикот;

⁴⁸тој може да биде откупен и по продавањето. Нека го откупи некој од неговите браќа;

⁴⁹или, нека го откупи неговиот стрико, неговиот роднина или кој и да е од неговото семејство од неговата крв. Или, ако има средства нека се откупи сам.

⁵⁰Нека го пресмета времето, со својот купувач, од годината кога му се продал до јубилејната година. Цената на неговото ослободување нека биде според бројот на годините. Времето што го поминал кај својот купувач нека се процени како време на еден наемник.

⁵¹Ако остануваат уште многу години, нека исплати за својот откуп сребро, сразмерно на цената со која бил купен.

⁵²А ако остануваат само неколку години до јубилејната година, нека пресмета и нека исплати за својот откуп според годините на службата.

⁵³Нека биде при него како наемник, во сите години. Тој не смее да господари над него со жестокост, пред твоите очи.

⁵⁴Ако не биде откупен вака; тогаш, тој и неговите деца, со него, нека си отидат во јубилејната година;

⁵⁵зашто Израелевите синови се Мои слуги; тие се Мои слуги, кои Јас ги изведов од Египетската Земја. Јас Сум Господ, ваш Бог.’