Read Библија, Константинов Левит (3 Moj.) 9 Bible Online

Левит (3 Moj.) 9 - Библија, Константинов bible

Левит (3 Moj.) 9

¹На осмиот ден Мојсеј ги повика Арона и неговите синови и израелевите старешини,

²и му рече на Арона: „Земи едно теле за жртва за грев и еден овен за паленица, двата без недостаток, и принеси ги пред Господа.

³А на синовите Израелеви речи им вака: ‘Земете еден јарец за жртва за грев, теле и јагне годиначе, без недостаток, за паленица;

⁴а јунец и овен за помирителна жртва за да ги жртвувате пред Господа; најпосле лебен принос, замесен со масло; зашто Господ ќе ви се јави денес.’”

⁵Тие доведоа пред Шаторот на средбата што им нареди Мојсеј; сета заедница истапи напред и застана пред Господа.

⁶„Ова е повелбата - рече Мојсеј - што Господ ја даде. Извршете ја, за да ви се покаже Господовата слава.”

⁷Потоа Мојсеј му рече на Арона: „Пристапи кон народот, принеси ја твојата жртва за грев и твојата паленица; и направи покривање на гревот за себеси и народот, и принеси принос од народот, и направи покривање на гревот за него, како што Господ нареди.”

⁸Арон му пристапи на жртвеникот и закла теле како жртва за својот сопствен грев.

⁹Ароновите синови му донесоа крв, па го накваси својот прст во крвта и ја стави врз роговите на жртвеникот. Потоа ја излеа другата крв во подножјето на жртвеникот.

¹⁰А лојот, бубрезите и мрежичката на црниот дроб од жртвата за грев ги изгоре на жртвеникот, како што Господ му нареди на Мојсеја.

¹¹Месото и кожата ги изгоре во оган надвор од логорот.

¹²И закла паленица, од која Ароновите синови му ја подадоа крвта. Тој со неа го попрска жртвеникот од сите страни.

¹³Му ја дадоа и паленицата, дел по дел, а така и главата, и тој ја изгоре на жртвеникот.

¹⁴Ги изми внатрешноста и нозете, па и нив ги изгоре на жртвеникот над паленицата.

¹⁵Потоа принесе принос од народот. Го зеде јарецот за грев што е за народот, го закла и го принесе како жртва за грев, како и поранешната.

¹⁶И принесе паленица и ја принесе според уставот.

¹⁷И принесе лебен принос, ја наполни раката од него и го изгоре на жртвеникот врз утринската паленица.

¹⁸Потоа закла јунец и овен како помирителна жртва од народот. Ароновите синови му ја подадоа крвта, а тој го попрска жртвеникот од сите страни;

¹⁹му го дадоа и лојот од јунецот и од овенот, опашката, лојот околу внатрешноста, бубрезите и мрежичката на црниот дроб.

²⁰Откако го положи лојот на градите, го изгоре на жртвеникот.

²¹А градите и десната плешка ги принесе како вртена жртва пред Господа, како што нареди Мојсеј.

²²А Арон ги подигна своите раце кон народот и го благослови. Откако ги принесе: жртвата за грев, паленицата и помирителната жртва, слезе.

²³Потоа Мојсеј и Арон влегоа во Шаторот на средбата. Кога излегоа го благословија народот. Господовата слава му се покажа на целиот народ.

²⁴Оган излезе од пред Господа и ги изгоре паленицата и лојта. Целиот народ го виде тоа, воскликна од радост и падна на своето лице.