Read Библија, Константинов Езекиел 10 Bible Online

Езекиел 10 - Библија, Константинов bible

Езекиел 10

¹Погледнав и ете, на сводот над главите на херувите се појави нешто како каменот сафир, како нешто слично на престол.

²И му прозбори на човекот облечен во ленено: „Влези меѓу колцата под херувите, земи полн грст жар меѓу херувите и истури ја над градот!” - И тој пред моите очи влезе меѓу херувите.

³А херувите стоеја од десната страна на Домот кога човекот влезе меѓу нив. И облакот го исполни сиот внатрешен двор.

⁴А Славата Господова се крена од херувите кон прагот на Домот. Домот се исполни со облакот, а светлината на Господовата Слава го исполни дворот.

⁵Шумот на херувските крила се слушаше сè до надворешниот двор, како гласот на Сèсилниот Бог, кога Тој зборува.

⁶А кога тој му заповеда на човекот облечен во ленено: „Земи оган меѓу колцата што се под херувите”, човекот влезе и застана покрај тркалата.

⁷Едниот херув ја протегна раката кон огнот, што беше меѓу херувите, го зеде и го стави во рацете на човекот облечен во ленена облека. Тој го прими и излезе.

⁸А под херувските крила се покажа нешто како човечка рака.

⁹Погледнав и ете: покрај херувите четири колца, по едно покрај секого. А тркалата беа слични на каменот хрисолит;

¹⁰сите четири со исти облик и како едното тркало да е во другото.

¹¹При движењето можеа да одат во сите четири насоки, сè без завртување. Каде што ќе се насочеше главата, натаму би тргнале а да не требаа, движејќи се, да се вртат.

¹²Целото тело на херувите - плеќите, рацете, крилата и сите четири нивни колца - сè им беше насекаде наоколу полно со очи.

¹³А колцата, колку што чув, се викаа „Виор”.

¹⁴Секој имаше по четири лица: лицето на првиот херувско, лицето на вториот човечко, а во третиот лице лавско, во четвртиот орелско.

¹⁵Тогаш херувите се подигнаа во височините, тоа беше истото суштество што го видов покрај реката Хевара.

¹⁶Кога херувите ќе тргнеа, ќе тргнеа и тркалата покрај нив, кога херувите ќе замавтаа со крилата за да се подигнат од земјата, колцата не се отстрануваа од нив.

¹⁷Кога ќе застанеа, и тркалата се креваа, зашто духот на суштествата беше во нив.

¹⁸Тогаш Господовата Слава се крена од прагот на Домот и застана над херувите.

¹⁹Тогаш херувите ги раширија крилата и се поткренаа од земјата пред моите очи. А кога тие тргнаа, и колцата тргнаа по нив. И застанаа над источната врата на Господовиот Дом, а Славата на Израелевиот Бог беше над нив.

²⁰Тоа беа истите суштества што ги видов во подножјето на Израелевиот Бог покрај реката Хевара. И така сознав дека тоа беа херуви.

²¹Во секого по четири лица и по четири крила, а под крилата нешто како човечка рака.

²²Лицата им беа како оние што ги видов при реката Хевара. И секој се движеше напред.