Read Библија, Константинов Езекиел 27 Bible Online

Езекиел 27 - Библија, Константинов bible

Езекиел 27

¹И ми дојде Господово слово:

²”А ти, човечки сине, почни со тажачка за Тир

³и речи му на Тир што лежи при влезот во морето и тргува со народите на безбројните острови: Господ Бог зборува вака: ‘Тиру што зборуваше: „Јас сум прекрасен, со вонредна убавина.”

⁴Твоите меѓи достигаат длабоко во морето, твоите градители те направија убав беспримерно.

⁵Од сенирските чемпреси ти изградија даски, зедоа ливански кедар, ти подигнаа јарболи;

⁶од васанските дабови ти изделкаа весла, од слоновата коска и од буковото дрво од Китимските Острови, ти ги направија седиштата!

⁷Од везениот египетски лен ти беа едрата, за да ти бидат знаме! А синото и пурпурното од Елиските Острови ти ги ставија за покриви.

⁸Жителите на Сидон и Арвад ти беа веслачи, а твоите мудреци, Тиру, ти беа кормилари!

⁹Гевалските старешини и вештаци ги поправуваа твоите расипани нешта. Сите морски бродови и морнари беа твои и тргуваа со тебе!

¹⁰Персијанците, Лудејците и Путејците беа војници во твојата војска, во тебе ги обесуваа штитовите и кацигите; тие ти даваа блесок.

¹¹Арвадските синови со војниците на ѕидовите твои наоколу, ти ги чуваа стражарниците. На ѕидовите наоколу ги бесеа штитовите за да ја возвеличат твојата единствена убавина!

¹²Заради твоето големо богатство дури и Тарсис тргуваше со тебе плаќајќи го со сребро и железо, со олово и со калај твоето производство.

¹³Јаван и Тувал и Месех тргуваа со тебе: даваа човечки души и бронзени садови за твоите стоки.

¹⁴Оние од Вет-Тогарма даваа коњи, тркачки коњи и мазги.

¹⁵И Дедановите синови тргуваа со тебе. Многу острови ти беа подложени: ти плаќаа данок во слонова коска и во абаносово дрво.

¹⁶Заради изобилството на твојата стока Едом тргуваше со тебе, ти даваа за стоките антракси отворено - порфир и везено, корали и рубини;

¹⁷и Јудеја и Израелевата Земја тргуваа со тебе со минитско жито, со восок со мед, со масло и со мирислива смола, за лек ги плаќаа твоите стоки!

¹⁸Заради изобилството на твојата трговија, заради твоето големо благо, и Дамаск тргуваше со тебе со хелвонско вино и со бела волна.

¹⁹И Дан и Јаван од Узел за твојата трговија менуваа прекалено железо, цимет и слатка трска.

²⁰Дедан тргуваше со тебе со покривки за коли.

²¹Арабјаните и кидарските кнезови вршеа размена со тебе и за тргувањето ти плаќаа со јагниња, јарци и со овни.

²²Трговците од Сава и од Рама тргуваа со тебе, за тргувањето ти даваа најдобрите бесценети камења и злато.

²³Харан, Кана и Еден, трговците на Сава, Асирија и Хилмад тргуваа со тебе. Менуваа за твоите стоки

²⁴скапоцени облеки, отворено црвени и везени наметки, шарени ткаенини и цврсто плетени јажиња.

²⁵Натоварените тарсиски бродови ја превезуваа твојата роба! Беше полн и многу славен во срцето на морето.

²⁶На отворено море, на многу мориња те изведоа веслачите. Источниот ветер те разби на морската широчина!

²⁷Твоето благо и твоето тргување, твоите ракотворби, твоите бродари и твоите кормилари, поправувачи на пукнатините, менувачите на твоето тргување, сите војници на тебе и сето мноштво сред тебе, ќе потонат на морското дно на денот на твојот бродолом!

²⁸На повикот за помош на твоите кормилари ќе се стресат бреговите.

²⁹И ќе слезат од своите бродови сите веслачи, сите бродари и сите кормилари и ќе останат на копно.

³⁰По тебе ќе тажат гласно и ќе стенкаат горчливо. Ќе ги посипуваат со пепел главите и ќе се прпелкаат во прав;

³¹И заради тебе ќе ги избричат главите, ќе се препашат со вреќиште, со јадосана душа ќе тажат по тебе и ќе заплачат горчливо.

³²Во тага ќе ти ја запеат тажачката, над тебе ќе тажат: „Кој град беше горделив како Тир сред морето?”

³³Зашто кога тој би го растоварил благото многу народи би ги наситил со тоа! Со изобилството на богатствата и со трговијата би усреќил многу земни цареви.

³⁴А ете, сега, морските бранови те здробија, потона во морските длабочини! Твоето богатство и сета посада потонаа со тебе.

³⁵Сите островски жители заради тебе се исплашија. Нивните цареви се наежија, главите ги наведнаа морално скршени.

³⁶Трговците на народите свиреа со уста по тебе, зашто ти стана страшило и те снема засекогаш!’”