Read Библија, Константинов Осија 4 Bible Online

Осија 4 - Библија, Константинов bible

Осија 4

¹Чујте го Господовото слово, Израелеви синови, зашто Господ спори со жителите на земјата. Нема веќе верност, нема милост, нема познавање Божјо на земјата,

²туку проклетство и лага, убивање и кражба, прељуба и насилство, една крв ја стигнува другата.

³Затоа земјата ќе тагува и ќе гинат сите нејзини жители со полските ѕверови и со небесните птици, та ќе гинат и рибите во морето.

⁴Сепак нека никој не се препира, нека никој не укорува. Но со тебе треба да се препирам, свештенику.

⁵Дење ти ќе се слизнуваш, а ноќе со тебе ќе се слизнува и пророкот; ќе ја погубам твојата мајка.

⁶Мојот народ гине: нема знаење; зашто ти го отфрли знаењето, и Јас те отфрлам тебе од Моето свештенство; зашто го заборави Законот на Својот Бог, и Јас ќе ги заборавам твоите синови.

⁷Колку повеќе ги имаше, толку повеќе грешеа против мене, својата слава ја заменија со срам.

⁸Тие се хранат со гревовите на Мојот народ, душата им лакоми за неговите беззаконија.

⁹И со свештеникот ќе биде како и со народот; ќе го казнам за неговите патишта и ќе му наплатам за неговите дела.

¹⁰Ќе јаде, но нема да се насити, ќе блудствува, но не ќе се размножува, зашто тие прекратија да Му служат на Бога -

¹¹блудството, пијалаците и виното им го пленија срцето.

¹²Мојот народ бара совет од дрво, неговата палка му дава одговори: зашто духот на развратот ги заведува нив, та бегајќи од Својот Бог му се предаваат на блудството.

¹³Тие жртвуваат на горските врвови и кадат на ридовите под даб, јаблан и под топола; зашто е толку пријатно под нивната сенка. И затоа, му се предаваат вашите ќерки на блудството, прават прељуба вашите невести,

¹⁴не ќе ги казнам ќерките зашто блудничат, ниту вашите невести зашто прават прељуба; зашто тие сами одат насамо со блудниците и жртвуваат со храмските љубовници. Така, без разум народот оди во пропаст!

¹⁵Ако ти, Израелу, му се предаваш на блудството, барем Јуда нека не греши! И не одете во Галгал, не искачувајте се во Вет Авен, не колнете се „живиот ми Господ.”

¹⁶Зашто како тврдоглава јуница, Израел стана тврдоглав, па како Господ да го спаси сега како јагне во широка ливада?

¹⁷Ефрем се здружи со идолите: Остави го!

¹⁸Одвратно е нивното пијанство, му се предаваат целосно на блудството, нивните кнезови го сакааат срамот.

¹⁹Виорот ќе ги стегне со своите крилја и ќе се засрамат од нивните жртви.