Read Библија, Константинов Осија 7 Bible Online

Осија 7 - Библија, Константинов bible

Осија 7

¹Кога сакам да го лечам Израел, се открива Ефремовото беззаконие и злобата на Самарија; тие се занимаваат со измама: крадецот провалува во куќата, а надвор напаѓаат разбојници.

²И тие не велат во своето срце дека Јас го помнам сето нивно беззаконие! Но сега нивните дела ги опколија, тие стојат пред Моето лице.

³Го веселат царот со својата злоба, а кнезовите со својата подмолност.

⁴Сите тие се прељубници, како вжарена печка што пекарот веќе не ја вжарува кога ќе го замеси тестото па додека не скисне.

⁵Во денот на нашиот цар кнезовите се разболеа од жестокоста на виното, а тој им ја испружува раката на пијаните.

⁶Во завера срцето им се вжарува како печка; нивната јарост дрема цела ноќ, наутро се разгорува како огнен пламен;

⁷сите се распалиле како печка та ги проголтуваат своите судови. Сите нивни цареви паднаа, а ниеден од нив не Ме повика.

⁸Ефрем се меша со народите, Ефрем е погача што не ја превртија.

⁹Туѓинците ја јадат неговата сила, а тој тоа и не го знае! Седите коси му ја обелија главата, а тој тоа и не го знае!

¹⁰Израелевата гордост е понижена во нивните очи и тие не се враќаат кај Господа, својот Бог, и покрај сè тие не Го бараат!

¹¹Ефрем е како наивен гулаб и без срце: тие го повикуваат Египет, одат во Асирија.

¹²Каде и да одат, ќе ја распнам Мојата мрежа врз нив, ќе ги оборам како небесните птици, ќе ги казнам како што слушале во нивното собрание.

¹³Тешко им ним зашто избегаа од Мене! Гибел за нив зашто се побунија против Мене! Сакам да ги откупам, а тие лажат против Мене.

¹⁴Тие не Ме повикуваат од срце кога лелекаат на своите легла; го раскинуваат своето лице заради житото и виното, ама се бунат против Мене.

¹⁵Додека Јас им ја крепев мишката, тие смислуваа зла против Мене!

¹⁶Се завртуваат кон ништожествата, тие се како измамливиот лак. Заради дрскиот јазик кнезовите ќе им паднат од меч, тоа ќе им биде потсмев во Египетската Земја!