Read Библија, Константинов Осија 8 Bible Online

Осија 8 - Библија, Константинов bible

Осија 8

¹Трубата на уста, како стражарот на Господовиот Дом; зашто тие го престапија Мојот Завет, го престапија Мојот Закон.

²Ми викаат Мене: „Те познаваме, Боже Израелев.”

³Ама Израел го отфрли доброто, непријателот ќе го гони.

⁴Поставуваа цареви без Мене, бираа кнезови без Мое знаење. Од своето сребро и злато си направија лажни богови, за да бидат уништени.

⁵Го отфрлив твоето теле, Самаријо, Мојот гнев се распламте против нив. До кога ќе останат нечисти Израелевите синови?

⁶Некој уметник го направи, и тоа не е Бог. Самариското теле ќе се претвори во делови.

⁷Посеаја ветер, и ќе пожнеат бура; житото не ќе им из’ртее, не ќе даде брашно; и ако даде, ќе го изедат туѓинци.

⁸Израел е проголтан, еве го меѓу народите како нескапоцена посатка;

⁹зашто отидоа кај Асирецот, кај дивото осле што живее само! Ефрем ги дарува љубовниците.

¹⁰Само нека ги дарува, сега ќе ги распрснам меѓу народите: и наскоро ќе се растреперат под товарот на царот на кнезовите.

¹¹Ефрем ги умножи жртвениците, тие му послужија за грев.

¹²Да му напишам и илјади Свои закони тие ќе ги сметаат за туѓи.

¹³Нека ги жртвуваат закланиците што Ми ги принесуваат, нека јадат месо! На Господа не Му се угодни. Отсега ќе ги спомнува нивните беззаконија и ќе ги казнува нивните гревови: тие ќе се вратат во Египет.

¹⁴Израел го заборави својот Творец и си изгради дворци; Јуда ги умножи цврстите градови. Ќе пуштам оган врз нивните градови; огнот ќе му ги голтне дворците.