Read Библија, Константинов Јоил 3 Bible Online

Јоил 3 - Библија, Константинов bible

Јоил 3

¹„Зашто ете, во оние денови и во она време, кога ќе им го вратам пленството на Јудеја и на Ерусалим,

²ќе ги соберам сите народи и ќе ги поведам во долината Јосафат. Таму ќе им судам заради Израел, Мојот народ и Моето наследство, кое го растераа меѓу народите и ја разделија меѓу себе Мојата земја.

³Фрлија жрепка за Мојот народ, даваа дечиња за блудници продаваа девојки за вино и пиеја.”

⁴„И вие, Тире и Сидоне, што сакате од Мене? И вие филистејски цареви? Сакате ли да ми се одмаздите? Ако Ми се одмаздувате Мене одмаздата ќе падне бргу на вашите глави.

⁵На вас што ми го одзедовте среброто и златото, што ги однесовте Моите богати ризници во вашите храмови,

⁶на вас кои им ги продававте на Грците, синовите на Јуда и на Ерусалим за да ги истерате од нивната родина.

⁷Ете, Јас ќе ги подигнам од местото, каде и да ги продадовте, и ќе направам вашето злосторство да падне на главите ваши.

⁸Ќе им ги продадам вашите синови и ќерки на Јудините синови, а тие ќе им ги продадат на Савејците, далечен народ. Зашто Господ рече!”

⁹Разгласете го ова меѓу народите: „Пригответе се за војна! Подигајте јунаци! Напред, нападнете, сите војници!

¹⁰Прековете ги ралата во мечеви, срповите во копја, слабиот нека рече: ‘Јунак сум!’”

¹¹Побрзајте и дојдете, сите околни народи, и соберете се онаму! (Господи, испрати ги онаму Твоите јунаци).

¹²„Станете народи, дојдете во Долината Јосафат, зашто таму ќе седнам да им судам на сите околни народи.

¹³Фаќајте се за српот: жетвата е зрела. Станете, слезете, бочвата е полна, каците се прелеваат, зашто е голема нивната нечесност.”

¹⁴Мноштво, мноштво, во Долината на Пресудата! Зашто е близу Господовиот Ден, во Долината на Судот!

¹⁵Сонцето и месечината ќе потемнат, ѕвездите ќе ја изгубат својата светлина,

¹⁶Господ ќе загрми од Сион, ќе дига глас од Ерусалим; небото и земјата ќе се тресат. Ама Господ ќе биде заштита на Својот народ и заштита на синовите на Израел.

¹⁷„Тогаш ќе знаете дека Јас Сум Господ ваш Бог, Кој престолува на Сион, на Мојата Света Гора. Ерусалим ќе ти биде светилиште, туѓинец веќе не ќе мине низ него.”

¹⁸Кога ќе дојде тој ден, горите ќе капат слатко вино, од бреговите ќе тече млеко, водата ќе затече низ сите речни корита во Јудеја. Извор ќе бликне од Господовата куќа за да ја напои Ситимската Долина.

¹⁹„Египет ќе запустее, Едом ќе стане безживотна пустина заради насилствата извршени врз Јудините синови, зашто пролеаја невина крв, во нивната земја.

²⁰Јудеја ќе биде населена довека и Ерусалим во сите колена.

²¹Ќе ја одмаздам нивната крв за која уште не се одмаздив. И Господ ќе пребива на Сион.”