Read Библија, Константинов Броеви (4 Moj.) 1 Bible Online

Броеви (4 Moj.) 1 - Библија, Константинов bible

Броеви (4 Moj.) 1

¹Во Синајската Пустина, во Шаторот на средбата, Господ му рече на Мојсеја, во првиот ден на вториот месец, во втората година по излегувањето од Египетската Земја:

²„Извршете попис на целата израелска заедница по родови и по семејства, наведувајќи ги имињата на сите машки, глава по глава.

³Од дваесет години нагоре, способните за борба во Израел, ти и Арон, избројте ги според нивните единици.

⁴Со вас нека биде по еден човек од секое племе, главатар на својот прадедовски дом.

⁵Ова се имињата на луѓето кои ќе ви помагаат: Елисур, син Седиуров, од Рувимовото племе;

⁶Саламил, син Сурисадеев, од Симеоновото племе;

⁷Насон, син Аминададов, од Јудиното племе;

⁸Натанаил, син Согаров, од Исахаровото племе;

⁹Елијав, син Хелонов, од Завулоновото племе.

¹⁰Од Јосифовите синови: Елисам, син Емиудов; од Ефремовото племе; Гамалиил, син Фадасуров, од Манасиевото племе;

¹¹Авидан, син Гадеониев, од Венијаминовото племе;

¹²Ахизер, син Амисадаев, од Дановото племе;

¹³Фагаел, син Ехранов од Асировото племе;

¹⁴Елисав, син Деуелов од Гадовото племе;

¹⁵Ахиреј, син Енанов, од Нефталимовото племе.”

¹⁶Тоа беа избраниците од општеството, владетели на нивните татковски племиња и главатари на Израелевите илјадници.

¹⁷Тогаш Мојсеј и Арон ги зедоа тие луѓе кои беа одредени по име,

¹⁸па ја свикаа целата заедница во првиот ден на вториот месец. Тогаш во пописот, според родовите и семејствата по ред, беше внесуван бројот на личностите повозрасни од дваесет години, еден по еден.

¹⁹Како што Господ му нареди на Мојсеја, така тој ги изброја во Синајската Пустина.

²⁰Кога беше утврдено Рувимовото потомство, на Израелевиот првенец, по неговите родови и семејства, ги запишаа глава по глава имињата на сите машки од дваесет години нагоре, на сите способни за борба.

²¹Преброените од Рувимовото племе беа четириесет и шест илјади и пет стотини.

²²Беа избројани Симеоновите потомци по нивните родови и семејства: беа избројани, глава по глава, имињата на сите машки од дваесет години нагоре, на сите способни за борба.

²³Избројаните од Симеоновото племе беа педесет и девет илјади и три стотини.

²⁴Кога беше утврдено потомството на Гадовите синови по нивните родови и семејства, беа избројани, глава по глава, имињата на оние од дваесет години и повеќе, на сите способни за војна.

²⁵Избројаните од Гадовото племе беа четириесет и пет илјади и шест стотини и педесет.

²⁶Кога беше утврдено потомството на Јудините синови по нивните родови и семејства, беа запишани, глава по глава, имињата на оние од дваесет години и повеќе, на сите способни за војна.

²⁷Избројаните од Јудиното племе беа седумдесет и четири илјади и шест стотини.

²⁸Кога беше утврдено потомството на Исахаровите синови по нивните родови и семејства, беа избројани, глава по глава, имињата на оние од дваесет години и повеќе, на сите способни за војување.

²⁹Избројаните од Исахаровото племе беа педесет и четири илјади и четири стотини.

³⁰Кога беше утврдено потомството на Завулоновите синови по нивните родови и семејства, беа запишани, глава по глава, имињата на сите од дваесет години и повеќе, на сите способни за војна.

³¹Избројаните од Завулоновото племе беа педесет и седум илјади и четири стотини.

³²Јосифовите синови: кога беше утврдено потомството на Ефремовите синови, по нивните родови и семејства, беа избројани, глава по глава, имињата на оние од дваесет години и повеќе, на сите способни за војна.

³³Избројаните од Ефремовото племе беа четириесет илјади и пет стотини.

³⁴Кога беше утврдено потомството на Манасиевите синови, по нивните родови и семејства, беа запишани, глава по глава, имињата на оние од дваесет години и повеќе, на сите способни за војна.

³⁵Избројаните од Манасиевото племе беа триесет и две илјади и двеста.

³⁶Кога беше утврдено потомството на Венијаминовите синови, по нивните родови и семејства, беа запишани, глава по глава, имињата на оние од дваесет години и повеќе, на сите способни за војна.

³⁷Избројаните од Венијаминово племе беа триесет и пет илјади и четири стотини.

³⁸Кога беше утврдено потомството на Дановите синови, по нивните родови и семејства, беа избројани, глава по глава, имињата на оние од дваесет години и повеќе, на сите способни за војна.

³⁹Избројаните од Дановото племе беа шеесет и две илјади и седум стотини.

⁴⁰Кога беше утврдено потомството на Асировите синови, по нивните родови и семејства, беа запишани, глава по глава, имињата на оние од дваесет години и повеќе, на сите способни за војна.

⁴¹Запишаните од Асировото племе беа четириесет и една илјада и пет стотини.

⁴²Кога беше утврдено потомството на Нефталимовите синови, по нивните родови и семејства, беа избројани, глава по глава, имињата на оние од дваесет години и повеќе, на сите способни за војна.

⁴³Избројаните од Нефталимовото племе беа педесет и три илјади и четири стотини.

⁴⁴Тоа се оние кои ги избројаа Мојсеј и Арон со дванаесетте израелски главатари, по еден човек од секој татковски дом.

⁴⁵Беа избројани сите Израелци, по татковските домови, од дваесет години и повеќе, сите способни за војна во Израел.

⁴⁶И така, сите избројани беа шест стотини и три илјади пет стотини и педесет.

⁴⁷Меѓу нив не беа вброени левитите по поколенијата на нивните татковци.

⁴⁸Имено, Господ му рече на Мојсеја:

⁴⁹„Само Левиевото племе не го внесувај во пописот на Израелците.

⁵⁰Туку ти самиот одреди ги левитите за служба во Шаторот на Сведоштвото; за сиот негов намештај и сè што спаѓа во него; тие нека го носат Шаторот и сиот негов прибор; тие нека служат во него и нека го поставуваат својот логор околу него.

⁵¹Кога Шаторот треба да биде преместен, левитите нека го разглобат; а кога Шаторот треба да застане, левитите нека го подигнат пак. Странец кој ќе му се доближи нека биде погубен.

⁵²Израелевите синови нека ги оптегнуваат своите шатори секој во својот логор; секој при своето знаме, по чети.

⁵³Левитите нека престојуваат околу Шаторот на Сведоштвото, за да не падне гнев врз Израелевото општество. Така левитите нека чуваат стража околу Шаторот на Сведоштвото.”

⁵⁴Израелците направија така како што Господ му нареди на Мојсеја. Така направија во сè.