Read Библија, Константинов Броеви (4 Moj.) 10 Bible Online

Броеви (4 Moj.) 10 - Библија, Константинов bible

Броеви (4 Moj.) 10

¹Господ му рече на Мојсеја:

²„Направи си две труби; направи ги од ковано сребро. Нека ти служат за свикување на заедницата и за раздвижување на логорот.

³Кога ќе се затруби со нив, сета заедница нека се собере кон тебе при влезот во Шаторот на средбата.

⁴Ако се затруби во една, нека се соберат кон тебе Израелевите главатари, илјадниците.

⁵Кога ќе го придружувате свирењето со бојни извици, нека тргнат логорите поставени на источната страна.

⁶Кога ќе го придружувате свирењето со бојни извици по вторпат, нека тргнат логорите поставени на јужната страна: свирењето со труби нека биде придружено со бојни извици за да тргнат тие.

⁷Трубете за да го соберете општеството, но без бојни извици.

⁸Свештениците, синовите Аронови, нека трубат во трубите. Тоа нека ви биде вечен закон за вашите поколенија.

⁹Кога во вашата земја ќе тргнете во војна против непријателот, што ќе ве притисне, затрубите во трубите со боен извик, и Господ, вашиот Бог, ќе се сети за вас, и ќе бидете избавени од вашите непријатели.

¹⁰Трубите во труби во денот на вашите свечености, на вашите празници или на вашите млади месечини, додека ги принесувате вашите паленици и помирителни жртви. Тоа нека биде спомнување за вас пред вашиот Бог. Јас Сум Господ, ваш Бог.”

¹¹Во втората година, во вториот месец, во дваесеттиот ден на месецот, облакот се дигна над Шаторот на сведоштвото.

¹²Тогаш Израелевите синови се запатија од Синајската Пустина на своите патувања. Облакот застана во пустината Фаран.

¹³Така тргнаа за првпат според Господовата заповед дадена на Мојсеја.

¹⁴Знамето на логорот на Јудините синови, по нивните чети, тргна прво. Насон, синот Аминадавов, беше над нивната војска;

¹⁵Натанаил, синот Суаров, беше над војската на племето на Исахаровците;

¹⁶а Елијав, синот Хелонов, беше над војската на племето на Завулоновите синови.

¹⁷Потоа, откако беше разглобен Шаторот, Гирсоновците и Мерариевците тргнаа, носејќи го Шаторот.

¹⁸Потоа тргна знамето на Рувимовиот логор, по нивните чети. Елисур, синот Седиуров, беше над нивната војска;

¹⁹Селумил, синот Сурисадаев беше над војската на племето на Симеоновците;

²⁰Елисаф, синот Рагуилов беше над војската на племето на Гадовите синови.

²¹Потоа тргнаа Каатовите синови носејќи го Светилиштето. Шаторот беше поставуван пред нивното доаѓање.

²²Тогаш тргна знамето на логорот на Ефремовите синови, по нивните чети. Елисам, синот Емиудов, беше над нивната војска;

²³Гамалил, синот Фадасуров, беше над војската на племето на Манасиевците;

²⁴Авидан, синот Гедеониев, беше над војската на племето на Венијаминовите синови.

²⁵Последно, како задна стража на сите логори, тргна знамето на логорот на Дановите синови, по нивните чети. Ахиезер, синот Амисадаев, беше над нивната војска;

²⁶Фагеил, синот Ехранов, беше над војската на племето на Асировите синови;

²⁷а Ахиреј, синот Енанов, беше над војската на племето на Нефталимовите синови.

²⁸Таков беше редот на патувањето на Израелците, подредени во нивните чети. Така патуваа.

²⁹Мојсеј му рече на Јовав, син на Мадијамецот Рагуил, Мојсеевиот дедо: „Се запативме во крај за кој Господ рече: ‘Ќе ви го дадам!’ Тргни со нас, и ќе ти направиме добро, зашто Господ му вети среќа на Израел.”

³⁰„Не идам - му одговори - туку се враќам во својата земја, се враќам при своите.”

³¹„Те молам, не нè оставај! - му рече. Бидејќи знаеш каде треба да се настаниме во пустината, ќе ни бидеш како очи.

³²Ако тргнеш со нас ќе ги делиме, со тебе, добрините што Господ ќе ни ги додели.”

³³Од Господовата Гора патуваа три дни одење. Ковчегот на Господовиот Завет одеше пред нив во текот на трите дни на одењето за да им побара место за починка.

³⁴Дење пак Господовиот облак беше над нив кога тргнуваа од логорот.

³⁵Кога тргнуваше Ковчегот, Мојсеј велеше: „Стани, Господи, и ќе се распрснат Твоите непријатели! Ќе избегаат пред Тебе, кои Те мразат!”

³⁶А кога застануваше, велеше: „Врати се, о, Господи, кон Израелевите илјади и десетиците илјади!”