Read Библија, Константинов Броеви (4 Moj.) 2 Bible Online

Броеви (4 Moj.) 2 - Библија, Константинов bible

Броеви (4 Moj.) 2

¹Господ им рече на Мојсеја и Арона:

²„Израелците нека ги оптегнуваат своите шатори секој при своето знаме, под знаците на својот татковски дом; нека ги поставуваат околу Шаторот на средбата, но малку подалеку.

³Однапред, на источната страна, знамето на Јудиниот логор, по нивните чети. Главатар на Јудините потомци е Насон, синот Аминадавов.

⁴Неговата војска брои седумдесет и четири илјади и шест стотини избројани.

⁵Исахаровото племе нека ги постави шаторите до него. Началник на Исахаровите потомци е Натанаил, синот Согаров.

⁶Неговата војска брои педесет и четири илјади и четири стотини запишани.

⁷Натаму Завулоновото племе. Началник на Завулоновите потомци е Елијав, синот Хелонов.

⁸Неговото воинство брои педесет и седум илјади и четири стотини запишани.

⁹По нивните чети, сите запишани во Јудиниот логор се сто осумдесет и шест илјади и четири стотини. Тие нека тргнуваат први!

¹⁰На југ е знамето на Рувимовиот логор, по нивните чети. Главатар на Рувимовите потомци е Елисур, синот Седнуров.

¹¹Неговата војска брои четириесет и шест илјади и пет стотини запишани.

¹²До него нека ги оптегнува шаторите Симеоновото племе. Началник на Симеоновите потомци е Саламил, синот Сурисадаев.

¹³Неговата војска брои педесет и девет илјади и три стотини запишани.

¹⁴Потоа Гадовото племе. Началник на Гадовите потомци е Елисаф, синот Рагуилов.

¹⁵Неговото воинство брои четириесет и пет илјади и шест стотини и педесет запишани.

¹⁶По нивните чети, сите избројани во Рувимовиот логор се сто педесет и една илјада и четири стотини и педесет. Тие нека тргнуваат втори!

¹⁷Потоа нека оди Шаторот на средбата, така што левитскиот логор да биде во средина на другите логори. Како што ги оптегнуваат шаторите, така се должни и да одат: секој под своето знаме.

¹⁸На запад, знамето на Ефремовиот логор, по нивните чети. Главатар на Ефремовите потомци е Елисам, синот Емиудов.

¹⁹Неговата војска брои четириесет илјади и пет стотини запишани.

²⁰До него е Манасиевото племе. Главатар на Манасиевите потомци е Гамалиил, синот Федасуров.

²¹Неговата војска брои триесет и две илјади и двеста избројани.

²²Потоа Венијаминовото колено. Главатар на Венијаминовите потомци е Авидан, синот Гадеониев.

²³Неговата војска брои триесет и пет илјади и четири стотини избројани.

²⁴По нивните чети, сите избројани во Ефремовиот логор се сто и осум илјади и сто. Тие нека тргнуваат трети!

²⁵На север, знамето на Дановиот логор, по нивните чети. Главатар на Дановите потомци е Ахиезер, синот Амисадаев.

²⁶Неговата војска брои шеесет и две илјади и седум стотини.

²⁷До него нека постави логор Асировото племе. Началник на Асировите потомци е Фагаил, синот Ехранов.

²⁸Неговата војска брои четириесет и една илјада и пет стотини запишани.

²⁹Потоа Нефталимовото племе. Началник на Нефталимовите потомци е Ахиреј, синот Енанов.

³⁰Неговата војска брои педесет и три илјади и четири стотини запишани.

³¹Сите запишани во Дановиот логор се сто педесет и седум илјади и шест стотини. Тие нека тргнуваат последни под своите знамиња.”

³²Тоа се избројаните Израелци според татковските домови. Сите избројани во логорите, по нивните чети, се шест стотини и три илјади и пет стотини и педесет.

³³Левитите не беа избројани со Израелците, како што Господ му нареди на Мојсеја.

³⁴Израелевите синови направија сè како што Господ му нареди на Мојсеја. Така ги поставуваа логорите при своите знамиња и така одеа, секој по својот род и по своите семејства.