Read Библија, Константинов Броеви (4 Moj.) 25 Bible Online

Броеви (4 Moj.) 25 - Библија, Константинов bible

Броеви (4 Moj.) 25

¹Додека Израел живееше во Ситим, народот почна да блудствува со Моавските ќерки.

²Тие го повикуваа народот на жртвувањата на своите богови, а народот јадеше на нивните гозби и им се поклонуваше на нивните богови.

³Така Израел се прилепи до Фегорскиот Ваал. И Господ пламна со гнев против Израел.

⁴„Собери ги сите народни началници - му рече Господ на Мојсеја. Обеси ги пред Господа на бел ден, за да се одврати Господовиот гнев од Израел.”

⁵Тогаш Мојсеј им рече на израелевите судии: „Нека секој ги погуби оние свои луѓе, кои се прилепија до Фегорскиот Ваал.”

⁶Токму тогаш некој од Израелевите синови дојде и доведе една Мадијанка при своите браќа, пред очите на Мојсеја и пред очите на сето Израелско општество, кое заплака при влезот од Шаторот на средбата.

⁷Кога Финес, синот Елеазаров, синот на свештеникот Арон, го забележа тоа, стана пред заедницата: зеде копје во раката

⁸и тргна по Израелецот, во лежиштето, и ги прободе двата, Израелецот и жената; неа низ слабините, па прекрати поморот на Израелевите синови.

⁹А тие кои изумреа од поморот беа дваесет и четири илјади.

¹⁰Господ му рече на Мојсеја:

¹¹„Финес, синот Елеазаров, синот на свештеникот Арон, ја одврати Мојата јарост од Израелевите синови, зашто покажа ревност за Мене, и Јас не ги истребив Израелевите синови во Мојата ревност.

¹²И така кажи му: ‘Еве, со него склучувам завет на мир.

¹³Тоа нека биде за него и за неговите потомци, после него, завет на вечно свештенство, зашто ревнуваше за својот Бог и ги застапи Израелевите синови.’”

¹⁴Името на Израелецот кој беше убиен - на оној кој беше погубен заедно со Мадијанката - беше Зимриј, син на Салу, началник на еден татковски дом на Симеоновците.

¹⁵А името на убиената жена Мадијанка и беше Хазвија. Беше Сурова ќерка. Сур беше родовски главатар на едно семејство во Мадијан.

¹⁶Господ му рече на Мојсеја:

¹⁷„Завојувај против Мадијанците и порази ги,

¹⁸зашто и тие војуваа против вас со итрина и ве измамија со Ваал-Фегор и со својата сестра Хазвија, ќерка на мадијански началник, која беше погубена во денот на поморот заради Фегор.”