Read Библија, Константинов Михеј 5 Bible Online

Михеј 5 - Библија, Константинов bible

Михеј 5

¹Собери се сега во чети, ќерко на четите! Опколени сме и опсадени сме, со палка го удираат по лицето Израелевиот Судија.

²„А ти, Витлеему Ефрато, најмалиот меѓу Јудините кнезови, од тебе ќе ми излезе Оној Кој ќе владее со Израел; Неговото потекло е од дамнини, од вечните времиња.”

³Затоа Господ ќе ги остави додека не роди таа која има да роди. Тогаш ќе се врати Остатокот на неговите браќа кај Израелевите деца.

⁴Тој ќе се исправи, ќе го изведува на пасење своето стадо со Господова сила, со величеството на името на својот Бог. Тие ќе живеат во мир, зашто тој ќе ја распростре Својата власт сè до земните краеви.

⁵Тој - Тој е мир! Ако Асирците навлезат во нашата земја, ако стапат во нашите дворци, ќе подигнеме против нив седум пастири, осум народни кнезови.

⁶Асирската Земја тие ќе ја испасат со меч, Невродовата Земја со мечеви. И Тој ќе нè ослободи од Асирците ако навлезат во нашата земја, ако стапнат на наша почва.

⁷И Јакововиот Остаток ќе биде меѓу бројните народи, како роса што доаѓа од Господа, како капки на дождот на тревата кој не го чека човекот ниту се колеба за човечките синови.

⁸А Јакововиот Остаток ќе биде меѓу бројните народи, како лав меѓу горските ѕверови, како лавче меѓу овци стада; секој пат кога поминува, тој гази со нозете, раскинува, и нема никој да се избави од него.

⁹Твојата рака нека се подигне на противникот, сите Твои непријатели ќе бидат сотрени!

¹⁰„Во оној ден - говори Господ - ќе ги истребам сите твои коњи, ќе ги уништам твоите бојни коли.

¹¹Ќе ја разурнам секоја населба по твојата земја, ќе ги срушам сите твои тврди градови.

¹²Ќе ги сотрам баењата од твојата рака, не ќе имаш веќе врачеви.

¹³Ќе ги истребам во тебе сите кипови и камени столбови. И ти веќе не ќе се поклонуваш пред делото на своите раце.

¹⁴Ќе ги искорнам ашерите од тебе и ќе ги разурнам твоите градови.

¹⁵Во гнев и во бес, ќе ја извршам одмаздата над народите кои не слушаа.”